ក្រុមហ៊ុននៅប្រទេសកូរ៉េ ពង្រីកអាជីវកម្មលើវិស័យព័ត៌មានបច្ចេកវិទ្យានៅតំបន់អាស៊ាន
ស៊ុំ ម៉ាណេត
Thursday, 18 February 2016
ភ្នំពេញ៖(ខ្មែរថាមស៍)ក្រុមហ៊ុន ជាច្រើនដែលមានមូលដ្ឋាននៅប្រទេសកូរ៉េកំពុងចាប់អារម្មណ៍ក្នុងការ ពង្រីកអាជីវកម្មរបស់ពួកគេលើវិស័យព័ត៌មានបច្ចេកវិទ្យានៅតំបន់ អាស៊ានពិសេសកម្ពុជា។ នេះបើយោងតាមសេចក្តីរាយការណ៍របស់កាសែតបាងកកប៉ុស្តិ៍។
ស្ថាប័ន Gyeonggi Center for Creative Economy & Innovation (G-CCEI) ដែលមានការគាំទ្រដោយរដ្ឋាភិបាលកូរ៉េ ផ្តល់ជំនួយសម្រាប់ការស្រាវជ្រាវ និងការអភិវឌ្ឍដល់ក្រុមហ៊ុនថ្មីដើម្បីធ្វើការប្រកួតប្រជែងក្នុង ប្រទេសកូរ៉េ និងជាសាកល។ លោក David Baek Se-hyeon មន្រ្តីជាន់ខ្ពស់ G-CCEI ប្រាប់កាសែតបាងកកប៉ុស្តិ៍ថា ក្រុមហ៊ុនកូរ៉េ ជាច្រើនកំពុងស្វែងរកដៃគូក្នុងតំបន់អាស៊ានដើម្បីពង្រីកអាជីវកម្ម របស់ពួកគេ។
លោក ថា៖ «បច្ចុប្បន្នយើងកំពុងស្វែងរកដៃគូក្នុងតំបន់អាស៊ាន ពិសេសកម្ពុជា ថៃ និងវៀតណាម ដើម្បីបង្កើតជំនួញ និងផលិតថ្មី ហើយយើងមានក្រុមហ៊ុនកូរ៉េ ចាប់ថ្មីជាច្រើនដែលមានគោលបំណងក្នុងពង្រីកអាជីវកម្មរបស់ពួកគេ ខណៈពួកគេកំពុងផ្ដោតលើទីផ្សារអាស៊ានជាទិសដៅវិនិយោគ»។
លោក បន្តថា ក្រុមហ៊ុនទាំងនោះចាប់អារម្មណ៍លើការវិនិយោគក្នុងវិស័យបច្ចេកវិទ្យា ដូចជា ទូរស័ព្ទ ព័ត៌មានវិទ្យា និងហ្គេមជាដើម។
ស្ថាប័ន G-CCEI បានបង្កើតក្រុមហ៊ុនថ្មីៗជាច្រើនដែលបានសហការជាមួយនឹងក្រុមហ៊ុន ជាច្រើននៅប្រទេសមួយចំនួនដូចជា ចិន បារាំង សិង្ហបុរី និងហុងគ្រី។ ស្ថាប័ន G-CCEI កាលពីពេលថ្មីនេះបានសហការជាមួយនឹងក្រុមហ៊ុនមួយចំនួននៅ សឹង្ហបុរី ដើម្បីអភិវឌ្ឍន៍ខ្សែកាប ហ្វាយប៊ែរអុបទិច ដែលមានតម្លៃជាង២,៣លានដុល្លារ។
លោក ស្រី ចន្ធី សេដ្ឋកិច្ចវិទូកម្ពុជា បានប្រាប់កាសែតខ្មែរថាមស៍ថា ប្រទេសកូរ៉េខាងត្បូង គឺមួយក្នុងចំណោមវិនិយោគិនសំខាន់ៗសម្រាប់ប្រទេសកម្ពុជា ពិសេសលើរោងចក្រកាត់ដេរ ទេសចរណ៍ និងកសិឧស្សាហកម្ម ហើយវានឹងហុចផលវិជ្ជមាន ប្រសិនស្ថាប័ននេះនឹងដាក់ការវិនិយោគខុសពីវិស័យខាងលើ។ លោកបន្តថា កូរ៉េខាងត្បូង គឺវិនិយោគិនសក្តានុពលដែលមានរយៈវែងសម្រាប់កម្ពុជា ប្រសិនបើកម្ពុជា អាចទាក់ទាញពួកគេបាន។
លោក ចន្ធី បន្តថា៖ «ដោយឡែកកម្ពុជា មានការលំបាកក្នុងប្រកួតប្រជែងក្នុងតំបន់អាស៊ាន ប្រសិនបើមិនពង្រឹងធនធានមនុស្ស និងស្ថាប័នផ្សេងៗ បន្តកែលំអហេដ្ឋារចនាសម្ព័ន្ធ និងការដឹកជញ្ជួន បន្ថយតម្លៃប្រេង និងថាមពល បន្តកែលំអការគ្រប់គ្រង បន្ទាបសេវាកម្មហិរញ្ញវត្ថុ និងផ្តល់ការលើកទឹកចិត្តដល់វិនិយោគិនដើម្បីកសាងធនធានមនុស្ស»។
លោក Miho Jon ប្រធាននៃភ្នាក់ងារលើកកម្ពស់ការវិនិយោគ និងពាជ្ជកម្មកូរ៉ ប្រចាំកម្ពុជា (KOTRA) បានឲ្យដឹងថា កម្ពុជា ជាប្រទេសមួយក្នុងចំណោមដៃគូអភិវឌ្ឍន៍សំខាន់សម្រាប់ប្រទេសកូរ៉េ។ លោក ថ្លែងថា៖ «កូរ៉េខាងត្បូង គឺវិនិយោគិនធំបំផុតទី៥ ក្នុងប្រទេសកម្ពុជា។ កូរ៉េ មានការសហការយ៉ាងខ្លាំងក្នុងវិស័យហេដ្ឋារចនាសម្ព័ន្ធ ហើយវានៅតែបន្តកិច្ចសហការនេះខណៈកម្ពុជា អាចដើរតួនាទីយ៉ាងសំខាន់ក្នុងសមាគមអាស៊ាន»។
លោក Miho បានថ្លែងថា៖ «ដោយផ្អែកលើកិច្ចសហការរបស់រដ្ឋាភិបាលទាំងពីរ KOTRA នឹងគាំទ្រដល់ការពង្រីក និងវិនិយោគនៅកម្ពុជា របស់ក្រុមហ៊ុនឯកជនកូរ៉េ ដើម្បីធ្វើឲ្យមានការរីកចម្រើន»៕
Source: http://www.khmertimeskh.com/news
