ប្រសិនបើលោកអ្នកជាពាណិជ្ជករនាំចូល ឬ នាំចេញ ឬក៏ជាអ្នកដំណើរមកកាន់ ឬ ចាកចេញពីប្រទេសកម្ពុជា ទំព័រនេះនឹងជួយ អ្នកឲ្យយល់នូវអ្្វីដែលអ្នកត្រូវការ ក្នុងការនាំចូល ឬ នាំចេញ នូវទំនិញ ឬផលិតផលផ្សេងៗ ។ លោកអ្នកអាចជ្រើសរើសពីតារាងមាតិកាខាងក្រោមដើម្បីមើលព័ត៌មានទាក់ទងនឹងការនាំចូល ឬ នាំចេញទំនិញ ពីប្រទេសកម្ពុជា ។
ប្រសិនបើអ្នកមានបំណងចង់នាំចូល ឬ នាំចេញទំនិញពីប្រទេសកម្ពុជាអ្នកគួរ៖
ជំហានដំបូងអ្នកត្រូវចុះបញ្ក្ជីក្រុមហ៊ុនជាមួយនាយកដ្ឋាន ចុះបញ្ជីពាណិជ្ជកម្មនៃ ក្រសួងពាណិជ្ជកម្ម ហើយចុះបញ្ជី សម្រាប់បង់ពន្ធអាករលើតម្លៃបន្ថែមនៅ អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុជាមុនសិន ។ តម្រូវការដាច់ខាតក្នុងការដាក់ប្រតិវេទន៍គយតាមរយៈប្រព័ន្ធទិនុ្នន័យគយស្វ័យប្រវត្តិ គឺជាលេខអត្តសញ្ញាណអ្នកជាប់ពន្ធ (TIN) ដូចដែលចេញដោយ អគ្គនាយកដ្ឋានពន្ធដារ លើការចុះបញ្ជីសម្រាប់អាករលើតម្លៃបន្ថែម ។
សម្រាប់ការដាក់ប្រតិវេទន៍គយ អ្នកប្រកាសទាំងអស់ (អ្នកនាំចូល ឬអ្នកនាំចេញ) ឈ្មួញកណ្តាលគយ ត្រូវតែចុះ បញ្ជីនៅអគ្គនាយកដ្ឋានគយ និងរដ្ឋាករ ។
ការចុះបញ្ជីអាចត្រូវបានទាមទារផងដែរនៅទីភ្នាក់ងាររដ្ឋាភិបាលដែលអនុញ្ញាត ឬផ្តល់អាជ្ញាប័ណ្ណ នាំចូលនិងនាំចេញទំនិញដែលត្រូវបានរឹតបន្តឹងនិងស្ថិតក្រោមការត្រួតពិនិត្យ ។ សម្រាប់ព័ត៌មានបន្ថែម សូមអញ្ជើញទៅកាន់តារាងវិធានការដែលបានរាយទៅតាម ទំនិញ ជាក់លាក់ ដែលអ្នកចង់នាំចូល ឬ នាំចេញ ឬស្វែងរក វិធានការ ស្តង់ដារ និងតម្រូវការពិសេស ទាំងអស់។
មុនពេលនាំទំនិញចូល ឬនាំចេញទំនិញចេញពីប្រទេសកម្ពុជា អ្នកគួរតែធានាថាទំនិញទាំងនោះមិនស្ថិតនៅក្នុងប្រភេទទំនិញ ដែលត្រូវបានហាមឃាត់ និងរឹតបន្តឹងនោះទេ ។
ទំនិញហាមឃាត់ មិនត្រូវបាននាំចូល នាំចេញ ឆ្លងកាត់ លក់ ឬចរាចរនៅក្នុងប្រទេសកម្ពុជា ក្រៅតែពីលក្ខខណ្ឌជាក់លាក់ណាមួយឡើយ ។ ឧទាហណ៍ ទំនិញសម្រាប់ប្រើដោយរដ្ឋាភិបាល ឬយោធា ។ ក្នុងចំណោមទំនិញហាមឃាត់រួមមានអាវុធ គ្រឿងញៀន សារធាតុ សរសៃប្រសាទ និងសារធាតុគីមីផ្សេងៗដែលមានគ្រោះថ្នាក់ ។
ទំនិញដែលបានជាប់កម្រិតកំណត់ គឺត្រូវបានអនុញ្ញាតឲ្យមានការនាំចូល ឬនាំចេញ ត្រូវស្ថិតនៅក្រោមការត្រួតពិនិត្យរបស់ទីភ្នាក់ងាររដ្ឋាភិបាល ។ ការត្រួតពិនិត្យណាមួយ អាចរួមបញ្ចូលទាំងតម្រូវការនៃការចុះបញ្ជីក្នុងនាមជាអ្នកនាំចូល ឬនាំចេញជាមួយនឹងទីភ្នាក់ងារនោះ ការទទួលបាន អាជ្ញាប័ណ្ណសម្រាប់នាំចូល ឬនាំចេញទំនិញដែលត្រូវបានរឹតបន្តឹង (ឧទាហរណ៍ ក្នុងរយៈពេលជាក់លាក់មួយ ឬក្នុងកម្រិតមួយជាក់លាក់) និងការទទួលបាននូវការអនុញ្ញាតនាំចូល ឬនាំចេញជាក់លាក់ ផ្តល់ឱ្យសម្រាប់ទំនិញនីមួយៗ ដែលនាំចូល ឬនាំចេញពីប្រទេសកម្ពុជា ។
អ្នកគួរតែប្រឹក្សាបទប្បញ្ញត្តិជាក់លាក់ ដែលចែងពីការហាមប្រាម និងការរឹតបន្តឹងនានា ដែលស្ថិតនៅក្រោម អនុក្រឹត្យលេខ២០៩ ស្តីពីការអនុវត្តបញ្ជីទំនិញហាមឃាត់ និងទំនិញជាប់កម្រិតកំណត់ អមជាមួយ ឧបសម្ព័ន្ធ១ ស្តីពីបញ្ជីទំនិញ និងឧបសម្ព័ន្ធ ២ ស្តីពីសេចក្តីពន្យល់ និងកំណត់សម្គាល់ និងតាមរយៈច្បាប់ ព្រមទាំងបទប្បញ្ញត្តិនៃទីភ្នាក់ងារដែលបានអនុញ្ញាត ។ សូមយោងទៅបញ្ជីវិធានការដែលរាយ នៅខាងក្រោម ទំនិញ ជាក់លាក់ណាមួយដែលអ្នកចង់នាំចូល ឬស្វែងរកពី វិធានការ ស្តង់ដារ និងតម្រូវការពិសេស នៅទីនេះ។
ប្រសិនបើទំនិញដែលអ្នកមានបំណង នាំចូល ឬនាំចេញ គឺជាប្រភេទទំនិញ ដែលស្ថិតនៅក្រោមការត្រួតពិនិត្យអនាម័យ និង ភូតគាមអនាម័យ អ្នកនឹងត្រូវគោរពតាមបទប្បញ្ញត្តិពិសេសទាក់ទងនឹងទំនិញទាំងនោះ ។ អ្នកអាចស្វែងរកនៅលើគេហទំព័រនេះ នូវរាល់ទំនិញដែលស្ថិតនៅក្រោមតម្រូវការខាងលើ ដោយប្រើប្រាស់តារាងស្វែងរកនៅក្នុង ទំព័រស្វែងរកទំនិញ។
អ្នកអាចនឹងត្រូវបានទាមទារឱ្យចុះបញ្ជី ស្នើសុំអាជ្ញាប័ណ្ណ ហើយរាល់ការផ្ញើទំនិញនីមួយ ត្រូវមានលិខិតអនុញ្ញាត ដើម្បីនាំចូល ឬនាំចេញទំនិញទាំងនោះ ទាំងការអនុញ្ញាតពីអគ្គនាយកដ្ឋានបសុសត្វ ឬ ពីអគ្គនាយកដ្ឋានកសិកម្មនៃ ក្រសួងកសិកម្ម រុក្ខាប្រមាញ់ និង នេសាទ។ សូមយោងទៅបញ្ជីវិធានការដែលបានរាយនៅក្រោម ទំនិញ ជាក់លាក់ណាមួយដែលអ្នកចង់នាំចូល ឬស្វែងរក វិធានការ ស្តង់ដារ និងតម្រូវការពិសេស នានា ដើម្បីបញ្ជាក់ថាការចុះបញ្ជី ឬការអនុញ្ញាត / អាជ្ញាប័ណ្ណត្រូវ បានទាមទារ ។
ព្រះរាជាណាចក្រកម្ពុជាបានបង្កើតកន្លែងផ្តល់ព័ត៌មានSPS ដូចដែលបានតម្រូវដោយកិច្ចព្រមព្រៀង វិធានការអនាម័យ និងភូតគាមអនាម័យ របស់អង្គការពាណិជ្ជកម្មពិភពលោក ។ លោកអ្នកអាចទាក់ទង កន្លែងផ្តល់ព័ត៌មានSPS ប្រសិនបើអ្នកមានសំណួរណាមួយ ដែលទាក់ទងនឹងតម្រូវការអនាម័យ និងភូតគាមអនាម័យ ។ អ្នកអាចរកបាននូវទំនាក់ទំនងលម្អិតនៃ កន្លែងផ្តល់ព័ត៌មាន SPS នៅទីនេះ។
ចំពោះប្រភេទផលិតផលមួយចំនួន ចាំបាច់ត្រូវទទួលបានលិខិតអនុញ្ញាតដែលបញ្ជាក់ថាផលិតផលបានអនុលោមតាមស្តង់ដារបច្ចេកទេសជាក់លាក់ ។ បញ្ញត្តិបច្ចេកទេសត្រូវផ្តល់ដោយ ក្រសួងឧស្សាហកម្ម និងសិប្បកម្ម។
អ្នកអាចស្វែងរកក្នុងគេហទំព័រនេះ នូវផលិតផលដែលស្ថិតនៅក្នុងតម្រូវការខាងលើ ដោយប្រើតារាងស្វែងរកនៅលើទំព័រស្វែងរកផលិតផល ។ ការពណ៌នាលម្អិតអំពីនីតិវិធី និងតម្រូវការឯកសារ អាចត្រូវបានរកឃើញនៅលើ ទំព័រស្វែងរកនីតិវិធី។
ព្រះរាជាណាចក្រកម្ពុជាបានបង្កើត របាំងបច្ចេកទេសចំពោះពាណិជ្ជកម្ម (TBT Enquiry Point) ។ នេះជាចំណុចទំនាក់ទំនងថ្នាក់ជាតិ ដែលបានអនុវត្តកាតព្វកិច្ចប្រកបដោយតម្លាភាព តាមរយៈកិច្ចព្រមព្រៀងទាក់ទងនឹងរបាំងបច្ចេកទេសចំពោះវិស័យពាណិជ្ជកម្ម (TBT Agreement) នៃអង្គការពាណិជ្ជកម្មពិភពលោក (WTO)។ អ្នកអាចស្វែងយល់បន្ថែមអំពី TBT និងព័ត៌មានលម្អិតអំពី កន្លែងផ្តល់ព័ត៌មាន TBT។
រាល់ទំនិញនាំចូល ឬនាំចេញពីប្រទេសកម្ពុជាត្រូវតែជូនដំណឹង និងបង់ ពន្ធនិងអាករ លើកលែងតែករណីពន្ធនិងអាករដែលត្រូវបានលើកលែង ឬត្រូវបានព្យួរ ។
ប្រតិវេទន៍មួយអាចបង្កើតឡើងដោយបញ្ជូនមកនូវទម្រង់ប្រកាសមួយពេញលេញ តាមរយៈប្រព័ន្ធអេឡិចត្រូនិច និងចុះហត្ថលេខា (ដែលទទួលស្គាល់ជា ឯកសាររដ្ឋបាលតែមួយ (SAD) តាមរយៈ ASYCUDA World និងជាច្បាប់ចម្លងរឹងនៅការិយាល័យគយ ដោយភ្ជាប់ជាមួយឯកសារមួយចំនួនជាអប្បមបរមាដូចខាងក្រោម៖
និង ប្រសិនបើចាំបាច់៖
លិខិតអនុញ្ញាតគយជាឯកសារដែលតម្រូវឲ្យមានភ្ជាប់មកជាមួយនឹងការចុះប្រតិវេទន៍គយ ក្នុងករណីនៃការនាំចូល និងនាំចេញនៃទំនិញដែលជាប់ទាក់ទងនឹង ៖
លិខិតអនុញ្ញាតគយ ត្រូវទទួលបានពីនាយកដ្ឋាននីតិវិធីគយនៃ អគ្គនាយកដ្ឋានគយ និងរដ្ឋាករ (GDCE) រាជធានីភ្នំពេញ និងត្រូវបានបង្ហាញតាមការកំណត់នៅការិយាល័យគយ ភ្ជាប់ជាមួយនឹងលិខិតស្នើសុំប្រតិវេទន៍គយ ។ ព័ត៌មានស្តីពីនីតិវិធីដើម្បីទទួលបានលិខិតអនុញ្ញាតគយអាចរកបាន នៅទីនេះ។
លិខិតអនុញ្ញាតគយនៃតំបន់សេដ្ឋកិច្ចពិសេស ជាឯកសារដែលតម្រូវឱ្យមានភ្ជាប់មកជាមួយនឹងលិខិតស្នើសុំប្រតិវេទន៍គយ ក្នុងករណីនៃការនាំចូល ឬនាំចេញទំនិញដែលទាក់ទងនឹងការផលិត និងប្រតិបត្តិការក្នុងតំបន់សេដ្ឋកិច្ចពិសេស ។ លិខិតអនុញ្ញាតគយនៃតំបន់សេដ្ឋកិច្ចពិសេស អាចត្រូវបានផ្តល់ឱ្យដោយនាយកដ្ឋានគ្រប់គ្រងតំបន់សេរី នៃ អគ្គនាយកដ្ឋានគយនិងរដ្ឋាករ នៅរាជធានីភ្នំពេញ និងក្នុងករណីខ្លះនៅតំបន់សេដ្ឋកិច្ចពិសេស ដែលមន្រ្តីគយត្រូវបានដាក់ឲ្យបម្រើការ ។ ព័ត៌មានលម្អិតទាក់ទងនឹងនីតិវិធីដើម្បីទទួលបានលិខិតអនុញ្ញាតគយតំបន់សេដ្ឋកិច្ចពិសេសអាចរកបាន នៅទីនេះ។
សម្រាប់ការនាំចូលផលិតផលឥន្ធនៈដែលរួមមាន ប្រេង ឧស្ម័ន និងផលិតផលដទៃទៀតដែលសំយោគចេញពីឥន្ធនៈ និងទំនិញដែលនាំចូលក្រោមរបបរួចពន្ធ លិខិតអនុញ្ញាតមួយត្រូវទទួលបានពី នាយកដ្ឋានគយរដ្ឋាករ នៃអគ្គនាយកដ្ឋានគយនិងរដ្ឋាករ នៅរាជធានីភ្នំពេញ ។ លិខិតអនុញ្ញាតនេះជាឯកសារដែលតម្រូវឱ្យមានភ្ជាប់មកជាមួយលិខិតស្នើសុំប្រតិវេទន៍គយ និងត្រូវទទួលបានមុនស្នើសុំប្រតិវេទន៍គយ ។
ដំណើរការដើម្បីទទួលបានលិខិតអនុញ្ញាតឲ្យនាំចូលផលិតផលឥន្ធនៈ និងទំនិញរួចពន្ធ ត្រូវមានអត្តសញ្ញាណច្បាស់លាស់ លើកលែងតែការនាំចូលផលិតផលឥន្ធនៈដែលអ្នកស្នើសុំបានទទួលការយល់ព្រមឲ្យនាំចូលផលិតផលឥន្ធនៈចូលមកប្រទេសកម្ពុជា ។ ព័ត៌មានលម្អិតស្តីអំពីនីតិវិធីដើម្បីទទួលបានលិខិតអនុញ្ញាតដើម្បីនាំចូលឥន្ធនៈ ឧស្ម័ន និងប្រេង និងទំនិញដែលនាំចូលក្រោមរបបរួចពន្ធ អាចរកបាន នៅទីនេះ។
ពន្ធគយត្រូវទូទាត់លើទំនិញនាំចូលគិតជាភាគរយនៃតម្លៃដែលបានប្រកាស ។ អត្រានៃពន្ធត្រូវបានគិតខុសៗគ្នា ទៅតាមទំនិញនាំចូលមកប្រទេសកម្ពុជា អាស្រ័យទៅតាមផលិតផលនិងប្រទេសនៃប្រភពដើម ។ អ្នកអាចមើលចំណាត់ថ្នាក់ និង អត្រាពន្ធនៃប្រទេសកម្ពុជា និង នៅក្នុងគេហទំព័រនេះ ជាមួយ តារាងស្វែងរកទំនិញ។
ទំនិញត្រូវបានចាត់ថ្នាក់ដោយប្រើកូដ៨ខ្ទង់ Harmonized System (HS) ដែលត្រូវបានរក្សាទុក និងកែសម្រួលដោយអង្គការគយពិភពលោក (WCO) ។ ការចាត់ថ្នាក់ពន្ធលើទំនិញនាំចេញនាំចូលត្រូវអនុលោមតាមស្តង់ដារ AHTN របស់អាស៊ាន (ASEAN Harmonized Tariff Nomenclature)។
ចំពោះទំនិញមួយចំនួន គយតម្រូវឲ្យមានវិក័យបត្រពាណិជ្ជកម្មដែលបានបញ្ជាក់ដោយនាយកដ្ឋានផែនការ បច្ចេកទេស និងការបរទេសនៃ អគ្គនាយកដ្ឋានគយ និងរដ្ឋាករ (GDCE) នៅរាជធានីភ្នំពេញ មុននឹងការដាក់លិខិតស្នើសុំប្រតិវេទន៍គយនៅការិយាល័យគយ ។ ព័ត៌មានលម្អិតអំពីនីតិវិធីដើម្បីបញ្ជាក់តម្លៃប្រតិវេទន៍គយអាចរកបាន នៅទីនេះ។
មូលដ្ឋាននៃការគណនាពន្ធ គឺកំណត់ទៅតាមតម្លៃពិតប្រាកដនៃទំនិញ (ដូចបានបញ្ជាក់នៅក្នុងវិក័យបត្រ ឬឯកសារនៃកិច្ចសន្យាលក់ដទៃទៀត) ។ ប្រសិនបើតម្លៃនៃទំនិញមិនអាចកំណត់បានតាមរយៈមធ្យោបាយនេះ គយនឹងព្យាយាមកំណត់តម្លៃនៃទំនិញតាមរយៈមធ្យោបាយដែលបញ្ជាក់ក្នុង ប្រកាសលេខ៣៨៧ ស្តីពីការកំណត់តម្លៃពន្ធគយសម្រាប់ទំនិញនាំចូល។
បច្ចុប្បន្ននេះ ប្រព័ន្ធគ្រប់គ្រងគយដោយស្វ័យប្រវត្តិ របស់ ASYCUDA ពិភពលោក ត្រូវបានតម្លើង និងប្រតិបត្តិការនៅស្ទើរគ្រប់កន្លែងត្រួតពិនិត្យគយអន្តរជាតិនៃប្រទេសកម្ពុជា រួមមាន កំពង់ផែក្រុងព្រះសីហនុ អាកាសយានដ្ឋានអន្តរជាតិភ្នំពេញ ផែស្ងួត និងតំបន់ព្រំដែនគោកជាច្រើនទៀត ។
សេចក្ដីលម្អិតលើនីតិវិធីសម្រាប់ដំណើរប្រតិវេទន៍គយ តាមរយៈ ASYCUDA ដែលអាចរកឃើញនៅ នៅទីនេះ។
ជារួម នីតិវិធីនេះតម្រូវឱ្យអ្នកនាំចូល ឬអ្នកនាំចេញ ឬ ឈ្មួញកណ្តាល បំពេញឯកសារប្រតិវេទន៍គយ (SAD) តាមប្រព័ន្ធ ASYCUDA ពិភពលោកដោយផ្ទាល់នៅតាមតំបន់គយ ។ អ្នកនាំចូល ឬអ្នកនាំចេញ អាចប្រើប្រាស់កុំព្យូទ័រនៅនឹងកន្លែង ដែលផ្តល់ដោយគយ ដើម្បីបំពេញឯកសាររដ្ឋបាលតែមួយ SAD ហើយបន្ទាប់មកការធ្វើឱ្យមានសុពលភាពដោយស្វ័យប្រវត្តិនៃទិន្នន័យ អ្នកនាំចូល ឬអ្នកនាំចេញ អាចបោះពុម្ព និងចុះហត្ថលេខាចំនួន២ ច្បាប់ មុននឹងដាក់ឯកសាររឹងនោះទៅគយ ជាមួយនឹងឯកសារយោងទាំងអស់ដែលទាមទារឱ្យភ្ជាប់មកជាមួយ ។ នីតិវិធីបន្ទាប់មកទៀត គឺដំណើរការតាមដានដោយប្រព័ន្ធអេឡិចត្រូនិក ហើយអ្នកជាប់ពន្ធគយ ឬ ជើងសារគយ នឹងត្រូវផ្ដល់ដំណឹងដោយស្វ័យប្រវត្តិអំពីស្ថានភាពនៃប្រតិវេទន៍ ។
នៅពេលដែលប្រតិវេទន៍ត្រូវបានដាក់ស្នើ និងចុះបញ្ជីដោយមន្រ្តីគយ ព្រមទាំង ត្រូវបានវាយតម្លៃ និងបញ្ជាក់ថាត្រឹមត្រូវ អ្នកនាំចូល ឬម្ចាស់ទំនិញ នឹងតម្រូវឱ្យបង់ពន្ធគយ និងពន្ធដា។
ពន្ធគយ និងពន្ធដានៃការនាំចូលនឹងតម្រូវឲ្យបង់ ដោយអនុលោមតាមបទប្បញ្ញត្តិ ជាធរមាន។ ប្រសិនបើការទូទាត់ត្រូវបានធ្វើឡើងតាមរយៈធនាគាជាតិនៃកម្ពុជា ឬ ស្ថាប័នហិរញ្ញវត្ថុដែលមាន ការអនុញ្ញាតដទៃទៀត វិក័យបត្រដែលចេញដោយ ស្ថាប័នទាំងនេះនឹង ត្រូវដាក់បញ្ជូនទៅមន្រ្តីគយ ដើម្បីជាភ័ស្តុតាងនៃការទូទាត់។ នៅច្រកព្រំដែន ការទូទាត់អាចធ្វើបាន ដោយផ្ទាល់នៅផ្នែកគណនី នៃការិយាល័យគយ ដោយមូលប្បទានប័ត្រដែលមានការបញ្ជាក់ ឬ សម្រាប់របបមួយចំនួនដោយមានការធានារបស់ធនាគារ ។
ក្រោយពេលការទូទាត់ពន្ធគយ និងពន្ធដាបានបញ្ចប់ មន្រ្តីគយនឹងចេញវិក័យបត្រគយតាមរយៈ ASYCUDA។
អគ្គនាយកដ្ឋានកម្ពុជាត្រួតពិនិត្យទំនិញអាហ័រណ នីហ័រណ និងបង្រ្កាបការក្លែងបន្លំ (កាំកុងត្រូល) នៃក្រសួងពាណិជ្ជកម្ម គឺជាភ្នាក់ងាររបស់រាជរដ្ឋាភិបាល ដែលមានកាតព្វកិច្ចធានាគុណភាព និងសុវត្ថិភាពនៃទំនិញ និងសេវាកម្ម សម្រាប់ការពារសុខភាព និងសុវត្ថិភាពនៃអ្នកប្រើប្រាស់, ធានាការការពារផលប្រយោជន៍សេដ្ឋកិច្ចរបស់អ្នកប្រើប្រាស់ , ធានាអនុលោមភាពទៅនឹងបទប្បញ្ញត្តិទាក់ទងនឹងពាណិជ្ជកម្ម ព្រមទាំងផ្ដល់សេវាត្រួតពិនិត្យពាណិជ្ជកម្ម ។
សម្រាប់ការនាំចូលផលិតផលអាហារ សារធាតុគីមី ថ្នាំ អគ្គិសនី និងសម្ភារៈអេឡិចត្រូនិច ទាំងអស់ តម្រូវឱ្យមានបែបបទមួយសម្រាប់ការិយាល័យ CAMCONTROL នៅភ្នំពេញ ដើម្បីទទួលបានការអនុញ្ញាតមុនទំនិញមកដល់ ។ ព័ត៌មានលម្អិតលើនីតិវិធី ដើម្បីទទួលបានការអនុញ្ញាតរបស់កាំកុងត្រូលមុនការមកដល់នៃទំនិញ អាចរកបាននៅទីនេះ។
ការអនុញ្ញាតវាយតម្លៃមុនទំនិញមកដល់ ទាមទារឱ្យមានការស្នើឯកសារ ជាមួយ ឯកសារពាណិជ្ជកម្មផ្សេងទៀត ទៅកាន់ការិយាល័យកាំកុងត្រូល នៅតាមតំបន់ព្រំដែន ទៅកាន់ការិយាល័យកាំកុងត្រូល ដើម្បីធ្វើអធិការកិច្ចលើទំនិញ ។ អធិការកិច្ចនេះត្រូវធ្វើឡើងរួមជាមួយនឹងមន្រ្តីគយ ហើយវាជាការចាំបាច់ដើម្បីទទួលការយល់ព្រមពីកាំកុងត្រូលបន្ទាប់ពីអធិការកិច្ច ដើម្បីធានាថា នៅពេលដែលមន្រ្តីគយអនុញ្ញាតឱ្យដឹកទំនិញចេញ ទំនិញទាំងនោះនឹងត្រូវចាកចេញពីតំបន់ផ្ទុកទំនិញ ។
អ្នកនាំចេញកម្ពុជា ត្រូវបញ្ជាក់ពីប្រភពដើមនៃទំនិញ ឬ បញ្ជាក់ពីកាតព្វកិច្ចគយ នៅពេលនាំចូលទៅកាន់ប្រទេសដែលជាគោលដៅនៃទំនិញ ។ អ្នកនាំចេញកម្ពុជា ត្រូវបានទាមទារឱ្យទទួលបាននូវវិញ្ញាបនបត្រដើមកំណើត ។ គ្រប់វិញ្ញាបនបត្រដើមកំណើត ត្រូវបានចេញដោយ ក្រសួងពាណិជ្ជកម្ម។ ព័ត៌មានទាក់ទងនឹងនីតិវិធីដើម្បីទទួលបានវិញ្ញាបនបត្រដើមកំណើតអាចរកបាននៅទីនេះ ខណៈដែលបទប្បញ្ញតិ្តទាក់ទងនឹងការផ្ដល់វិញ្ញាបនបត្រដើមកំណើត អាចត្រូវបានរកឃើញតាមរយៈការស្វែងរក អត្ថបទគតិយុត្ត។
ប្រសិនបើអ្នកមានបំណងដឹកជញ្ជូនទំនិញពីព្រំដែនអន្តរជាតិមួយ ទៅកាន់ព្រំដែនមួយទៀត តាមរយៈព្រំប្រទល់នៃប្រទេសកម្ពុជា អ្នកត្រូវតែប្រកាសពីទំនិញទៅកាន់មន្រ្តីគយដោយអនុវត្តតាមនីតិវិធីនៃការឆ្លងកាត់ទំនិញ ។
ការប្រកាសនាំចូលស្ថិតក្រោមរបបនៃការឆ្លងកាត់ទំនិញ ត្រូវតែដាក់ស្នើទៅកាន់មន្រ្តីគយ នៅពេលទំនិញមកដល់ព្រំដែនកម្ពុជា។
ឯកសារខាងក្រោមនេះ ត្រូវតែភ្ជាប់មកជាមួយនឹងការប្រកាស :
ហើយប្រសិនបើចាំបាច់
ការឆ្លងកាត់នៃទំនិញមិនតម្រូវឲ្យបង់ពន្ធនោះទេ ប៉ុន្តែអ្នកប្រកាសត្រូវតែផ្តល់ឱ្យនូវការធានាជាទម្រង់មូលប្បទានបត្រ ឬ លិខិតធានា ចេញដោយធនាគារ ឬ គ្រឹះស្ថានហិរញ្ញវត្ថុនៅក្នុងចំនួនទឹកប្រាក់ស្មើនឹងកាតព្វកិច្ចគយ និង កាតព្វកិច្ចដទៃទៀតដែលធានាថាទំនិញមានសុវត្ថិភាព ។
ទំនិញដែលត្រូវឆ្លងកាត់ ត្រូវតែអនុវត្តតាមការណែនាំរបស់មន្ត្រីគយ ហើយនៅពេលទៅដល់ព្រំដែនខាងក្រៅ ឯកសារសម្រាប់ការឆ្លងកាត់ត្រូវតែដាក់ស្នើទៅកាន់មន្រ្តីគយសម្រាប់ការត្រួតពិនិត្យ ។ ប្រសិនបើនីតិវិធីប្រព្រឹត្តិទៅមានសណ្តាប់ធ្នាប់ នោះមន្រ្តីគយនឹងអនុញ្ញាតឱ្យទំនិញទាំងនេះចាកចេញពីកម្ពុជា ហើយការធានានឹងត្រូវបានលុបចោល ។ ប្រសិនបើការធានាត្រូវបានធ្វើក្រោមទម្រង់ជាមូលប្បទានបត្រ នោះវានឹងត្រូវបានសងជូនទៅអ្នកប្រកាសនោះវិញ ។
ប្រសិនបើអ្នកមានសំណួរណាមួយ សូមទាក់ទងមកយើងខ្ញុំ។
© ក្រសួងសេដ្ឋកិច្ច និងហិរញ្ញវត្ថុ ព្រះរាជាណាចក្រកម្ពុជា រក្សាសិទ្ធិគ្រប់យ៉ាង ឆ្នាំ២០២២។
គ្រប់គ្រង និងអនុវត្តដោយលេខាធិការដ្ឋាន NTR ។