បរិយាយ

សំរាប់ការធ្វើអាជីវកម្មនាំចេញ / នាំចូល ផលិតផលឈើកែច្នៃ ឬអនុផលព្រៃឈើ អតិថិជនត្រូវធ្វើការស្នើសុំនូវប្រភេទលិខិតអនុញ្ញាតិដូចខាងក្រោម៖

·        លិខិតអនុញ្ញាតជាគោលការណ៏សំរាប់ការនាំចេញ / នាំចូល

·        អាជ្ញាបណ្ណនាំចេញ/នាំចូលផលិតផលឈើកែច្នៃ ឬអនុផលព្រៃឈើ

·        លិខិតអនុញ្ញាតដឹកជញ្ជូនផល អនុផលព្រៃឈើនាំចេញ  / នាំចូល

ឯកសារនេះបញ្ជាក់ពីការអនុវត្តនិតិវិធីរបស់អតិថិជនក្នុងការស្នើសុំ អាជ្ញាបណ្ណនាំចេញ/នាំចូលផលិតផលឈើកែច្នៃ ឬអនុផលព្រៃឈើ  ដែលជាការតម្រូវមុននឹងធ្វើការនាំចេញ នាំចូល។ ការអនុវត្តនិតិវិធីរបស់អតិថិជនក្នុងការស្នើសុំ លិខិតអនុញ្ញាតជាគោលការណ៏សំរាប់ការនាំចេញ និងសំរាប់ការនាំចូលមានតំណាក់កាលដូចគ្នា លើកលែងតែការតម្រូវទៅលើចំនួន និងប្រភេទឯកសារភ្ជាប់។

ដើម្បីមានសិទ្ធក្នុងការស្នើសុំអាជ្ញាបណ្ណនាំចេញ/នាំចូល អតិថិជនត្រូវមានការអនុញ្ញាតជាគោលការណ៏សំរាប់ការនាំចេញ នាំចូលពីក្រសួងកសិកម្មសិនតាមរយៈការស្នើសុំលិខិតអនុញ្ញាតជាគោលការណ៏សំរាប់ការនាំចេញ / នាំចូលនៅរដ្ឋបាលព្រៃឈើ។

កន្លែងដាក់ពាក្យស្នើសុំ

រដ្ឋបាលព្រៃឈើ មិនមានច្រកចេញចូលតែមួយទេ ហើយក៏មិនស្ថិតនៅក្នុងទីស្តីការក្រសួងកសិកម្មដែរ។

ន.ឧស្សាហកម្មព្រៃឈើ និងសហប្រតិបត្តការអន្តរជាតិ(ន.ឧស.ព្រៃឈើ)ជានាយកដ្ឋានជំនាញក្នុងការផ្តល់សេវាកម្មទៅលើការចេញប្រភេទលិខិតអនុញ្ញាតិខាងលើ។​ រាល់ការទទួលគំរូពាក្យស្នើសុំ ការដាក់ពាក្យ ការបង់កម្រៃសេវា និងការទទួលលិខិតគឺធ្វើនៅនាយកដ្ឋានដោយផ្ទាល់ ដោយនាយកដ្ឋានមានការិ.រដ្ឋបាលនិងការិយាល័យហិរញ្ញវត្ថុ​ ដែលស្ថិតនៅក្នុងទីតាំងនាយកដ្ឋានតែមួយ។

ន.ឧស្សាហកម្មព្រៃឈើ និងសហប្រតិបត្តការអន្តរជាតិមានទីតាំងក្នុងរដ្ឋបាលព្រៃឈើ ។

រដ្ឋបាលព្រៃឈើ ៖

លេខ៤០ មហាវិថីព្រះនរោត្តម សង្កាត់ផ្សារកណ្ដាល២ ខ័ណ្ឌដូនពេញ ភ្នំពេញ

ទូរស័ព្ទ:        023 212 201

វែបសាយ:      http://www.forestry.gov.kh/

សំគាល់ 1

ពាក្យស្នើសុំមិនមែនជា Form ទេ តែជាលិខិតស្នើសុំ ដែលមានគម្រូស្រាប់នៅរដ្ឋបាលព្រៃឈើ។ អតិថិជនអាចទទួលគំរូលិខិតស្នើសុំនៅការិ.រដ្ឋបាល ឬការិ. ពាណិជ្ជកម្ម និងវិញ្ញាបនបត្រព្រៃឈើ នៃន.ឧស.ព្រៃឈើ។

សំគាល់ 2

អតិថិជនអាចចាត់តំណាងមកដាក់ពាក្យស្នើសុំ តែត្រូវឲ្យមានលិខិតប្រគល់សិទ្ធ ឬលិខិតឧទ្ទេសនាម។

​

ឯកសារភ្ជាប់សម្រាប់ការស្នើសុំអាជ្ញាបណ្ណនាំចេញផលិតផលឈើកែច្នៃ ឬអនុផលព្រៃឈើ រួមមាន៖

• លិខិតអនុញ្ញាតជាគោលការណ៏សំរាប់ការនាំចេញផលិតផលឈើកែច្នៃ ឬអនុផលព្រៃឈើ (ច្បាប់ដើម)
• លិខិតអនុញ្ញាតដឹកជញ្ជូនផល អនុផលឈើចូលរោងម៉ាស៊ីន (PC) (ច្បាប់ចម្លង) លើកលែងឈើដែលមានប្រភពពីចម្ការឈើដាំ
• វិក័យប័ត្រពាណិជ្ជកម្ម (ច្បាប់ដើម)
• កិច្ចសន្យាទិញលក់ផលិតផលឈើកែច្នៃ(ច្បាប់ដើម)

ឯកសារភ្ជាប់សម្រាប់ការស្នើសុំអាជ្ញាបណ្ណនាំចូលផល អនុផលព្រៃឈើ រួមមាន៖

• លិខិតអនុញ្ញាតជាគោលការណ៏សំរាប់ការនាំចូលផល អនុផលព្រៃឈើ (ច្បាប់ដើម)
• វិញ្ញាបនបត្របញ្ជាក់ប្រភពដើមទំនិញ
• អញ្ញត្តិបណ្ណដឹកជញ្ជូនផ្លូវទឹក ផ្លូវគោគ ផ្លូវអាកាស (bill of lading) (ច្បាប់ដើម ឬច្បាប់ចម្លង)
• បញ្ជីរាយលំអិតទំនិញ(ច្បាប់ដើម)
• វិក័យប័ត្រពាណិជ្ជកម្ម (ច្បាប់ដើម)
• ឯកសារកិច្ចសន្យាទិញលក់ទំនិញ(ច្បាប់ដើម) និងឯកសារពាក់ព័ន្ធ

រាល់ឯកសារភ្ជាប់ជាច្បាប់ចម្លង ដូចជា អត្តសញ្ញាណប័ណ្ណ លិខិតឆ្លងដែន វិញ្ញាបនបត្រ គ្រប់ប្រភេទត្រូវភ្ជាប់ ឬបង្ហាញច្បាប់ដើមដល់មន្ត្រីទទួលឯកសារ ឬត្រូវមានសេចក្តីបញ្ជាក់លើឯកសារថតចម្លងទាំងនោះដោយសាលារាជធានី ខេត្ត ក្រសួង​ ស្ថាប័នសាម៉ី។

សំគាល់ 3

ការអនុវត្តនិតិវីធីផ្ទៃក្នុងត្រូវបានចាប់ផ្តើមពីនាយកដ្ឋានជំនាញ និងឆ្លងកាត់តាមឋានានុក្រមមួយចំនួនដែលមានកំនត់ក្នុងច្បាប់រហូតដល់មានការអនុម័តយល់ព្រមជាចុងក្រោយ។ ក្នុងតំណាក់កាលនេះ រដ្ឋបាលព្រៃឈើមានធ្វើសំយោគលទ្ធផលវាយតម្លៃ និងលើកជាសំណើរភ្ជាប់ជាមួយនឹងឯកសារពាក្យស្នើសុំរបស់អតិថិជន ដើម្បីសុំការអនុម័តយល់ព្រមពីក្រសួងកសិកម្ម។ ក្រសួងកសិកម្ម បន្ទាប់ពីពិនិត្យនិងវាយតម្លៃលើសំណើរនេះហើយ ក៏នឹងធ្វើសំយោគលទ្ធផលវាយតម្លៃ ហើយលើកជាសំណើរសុំអាជ្ញាបណ្ណ ភ្ជាប់ជាមួយនឹងឯកសារពាក្យស្នើសុំរបស់អតិថិជនទៅក្រសួងពាណិជ្ជកម្ម។

បន្ទាប់ពីបានទទួលលិខិតឯកភាពយល់ព្រមអីពីក្រសួងកសិកម្ម និងអាជ្ញាបណ្ណរបស់ក្រសួងពាណិជ្ជកម្ម ទើបមន្ត្រីជំនាញនៃរដ្ឋបាលព្រៃឈើទំនាក់ទំនងទៅអតិថិជនឲ្យមកបង់កម្រៃសេវា។

សំគាល់ 4

តម្លៃសេវាកម្ម ដែលបានកំណត់ក្នុងប្រកាសរួមរបស់ក្រសួងសេដ្ឋកិច្ច​​ និងក្រសួងកសិកម្ម ស្តីពីការផ្តល់សេវាសាធារណៈរបស់ក្រសួងកសិកម្ម គឺ១%នៃតម្លៃតាមអាជ្ញាបណ្ណ (FOB)។

សំគាល់ 5

ពេលមកទទួលយកអាជ្ញាបណ្ណអតិថិជនគួរភ្ជាប់មកជាមួយអត្តសញ្ញាណប័ណ្ណ ឬលិខិតសំគាល់ខ្លួនផ្សេងៗ រួមជាមួយនឹងបង្កាន់ដៃទទួលពាក្យ។ អាជ្ញាបណ្ណ មានបញ្ជាក់ពីយថាប្រភេទ បរិមាណ នៃទំនិញ និងសុពលភាព (តាមការកំណត់ក្នុងអាជ្ញាបណ្ណ)។