បរិយាយ

ការស្នើសុំលិខិតអនុញ្ញាតការនាំចូលឧបករណ៏មាត្រាសាស្រ្ត និងស្តង់ដារមាត្រាសាស្រ្តមានដូចជាជញ្ជីងមាត្រាសាស្រ្ត ទែម៉ូម៉ែត្រ ម៉ូទ័រទឹកជាដើម គឺអនុលោមទៅតាមប្រកាសស្តីពីនិតិវិធី និងបែបបទនៃការស្នើសុំនាំចូលឧបករណ៏មាត្រាសាស្រ្តដែលបានចែងថា រាល់ឧបករណ៏មាត្រាសាស្រ្តអាចអនុញ្ញាតឲ្យនាំចូលសម្រាប់សកម្មភាពពាណិជ្ជកម្ម ឧស្សាហកម្ម សេវាកម្ម អាជីវកម្ម និង/ឬ វិស័យផ្សេងៗ ត្រូវមានលិខិតអនុញ្ញាតការនាំចូលដែលចេញដោយមជ្ឈមណ្ឌលមាត្រាសាស្រ្តជាតិ របស់ក្រសួងឧស្សាហកម្ម និងសិប្បកម្ម។

​វិធាននៃការគ្រប់គ្រងការនាំចូលឧបករណ៏មាត្រាសាស្រ្តនេះ​ មានគោលបំនងធានាឲ្យការធ្វើពាណិជ្ជកម្ម សេវាកម្ម មានភាពយុត្តិធម៌ និងត្រឹមត្រូវ ជំរុញឲ្យការប្រើប្រាស់ឧបករណ៏ទាំងនេះស្របតាមប្រព័ន្ធឯកតាមាត្រាសាស្រ្តជាតិស្របច្បាប់។

កន្លែងដាក់ពាក្យស្នើសុំ

រាល់ការទទួលគំរូពាក្យស្នើសុំ ការដាក់ពាក្យ​ ការបង់កម្រៃសេវា និងការទទួលលិខិតគឺធ្វើនៅបញ្ជរច្រកចេញចូលតែមួយរបស់ក្រសួងឧស្សាហកម្ម និងសិប្បកម្មដែលមានទីតាំងក្នុងទីស្តីការក្រសួង ហើយមិនស្ថិតនៅមជ្ឈមណ្ឌលមាត្រាសាស្រ្តជាតិទេ។

បញ្ជរច្រកចេញចូលតែមួយនេះមានមន្រ្តីមកពីមជ្ឈមណ្ឌលមាត្រាសាស្រ្តជាតិនៅប្រចាំការដើម្បីបំរើផ្តល់សេវាកម្មដែលទាក់ទងនឹងអង្គភាពរបស់ខ្លួន។

បញ្ជរច្រកចេញចូលតែមួយ នៃក្រសួងឧស្សាហកម្ម និងសិប្បកម្ម៖

ទីស្តីការក្រសួងក្រសួងឧស្សាហកម្ម និងសិប្បកម្ម

លេខ ៤៥ មហាវិថី ព្រះនរោត្តម ខ.ដូនពេញ រាជធានីភ្នំពេញ

Website: http://mih.gov.kh/

មជ្ឈមណ្ឌលមាត្រាសាស្រ្តជាតិ៖

លេខ ២០៩ ផ្លូវជាតិលេខ ៥ ស.គីឡូម៉ែត្រលេខ ៦ ខ.ឬស្សីកែវ រាជធានីភ្នំពេញ

សំគាល់ 1

អតិថិជនអាចទំនាក់ទំនងទៅបញ្ជរច្រកចេញចូលតែមួយរបស់ក្រសួងឧស្សាហកម្ម និងសិប្បកម្ម​ ដើម្បីសុំគម្រូពាក្យស្នើសុំ។​

សំគាល់ 2

អតិថិជនអាចចាត់តំណាងមកដាក់ពាក្យស្នើសុំ តែត្រូវឲ្យមានលិខិតប្រគល់សិទ្ធ ឬលិខិតឧទ្ទេសនាម ។ អតិថិជនត្រូវបង់កម្រៃសេវា ដែលបានកំណត់តាមតម្លៃនៃការនាំចូល គឺចាប់១០ម៉ឺន រហូតដល់៤០ម៉ឺន។ បង្កាន់ដៃបង់ប្រាក់មួយច្បាប់នឹងត្រូវប្រគល់មកអតិថិជន​ និងមួយច្បាប់ទៀតត្រូវភ្ជាប់ជាមួយនឹងសំណុំឯកសារពាក្យស្នើសុំ។

​

ឯកសារអមភ្ជាប់សម្រាប់ការស្នើសុំលិខិតអនុញ្ញាតការនាំចូលឧបករណ៏មាត្រាសាស្រ្ត និងស្តង់ដារមាត្រាសាស្រ្តមាន៖

• សម្រង់ពត៌មាន ឬរូបភាពនៃគំរូឧបករណ៏មាត្រាសាស្រ្ត និងស្តង់ដារមាត្រាសាស្រ្ត ដែលសុំនាំចូល
• បញ្ជីរាយនាមឧបករណ៏មាត្រាសាស្រ្ត និងស្តង់ដារមាត្រាសាស្រ្ត ដែលសុំនាំចូល

សំគាល់ 3

ការអនុវត្តនិតិវីធីផ្ទៃក្នុងត្រូវបានចាប់ផ្តើមពីការិយាល័យជំនាញ និងឆ្លងកាត់តាមឋានានុក្រមមួយចំនួនដែលមានកំនត់ក្នុងច្បាប់។ មុននឹងឈានដល់សេចក្តីសំរេចណាមួយ មន្ត្រីជំនាញអាចនឹងទំនាក់ទំនងទៅអតិថិជនដោយផ្ទាល់ សំរាប់ការបំពេញបន្ថែម​ចាំបាច់ណាមួយដែលត្រូវការសំរាប់ភាពគ្រប់គ្រាន់នៃការស្នើសុំដូចជាតម្រូវឲ្យអតិថិជនយកឯកសារបន្ថែមមកផ្តល់ជូនមន្រ្តីជំនាញជាដើម។

ដោយបញ្ជរច្រកចេញចូលតែមួយរបស់ក្រសួងឧស្សាហកម្ម និងសិប្បកម្មមិនស្ថិតនៅក្នុងទីតាំងមជ្ឈមណ្ឌលមាត្រាសាស្រ្តជាតិ រាល់ការបញ្ជូនឯកសារទៅមកគឺត្រូវបានធ្វើដោយមន្រ្តីរបស់មជ្ឈមណ្ឌលមាត្រាសាស្រ្តជាតិដែលប្រចាំការនៅបញ្ជរច្រកចេញចូលតែមួយ។

សំគាល់ 4

លិខិតអនុញ្ញាតនេះមានសុពលភាព ៦ខែ។ ពេលមកទទួលយកលិខិតអនុញ្ញាត អតិថិជនគួរភ្ជាប់មកជាមួយអត្តសញ្ញាណប័ណ្ណ ឬលិខិតសំគាល់ខ្លួនផ្សេងៗ រួមជាមួយនឹងបង្កាន់ដៃទទួលពាក្យ/បង្កាន់ដៃបង់ប្រាក់។

នៅពេលឧបករណ៏មាត្រាសាស្រ្ត បាននាំចូលមកដល់ទីកន្លែងស្តុកក្នុងប្រទេស អតិថិជនដែលជាអ្នកនាំចូលត្រូវធ្វើសេចក្តីជូនតំនឹងជាលាយលក្ខណ៏អក្សរជាបន្ទាន់មកមជ្ឈមណ្ឌលមាត្រាសាស្រ្តជាតិ ដើម្យីស្នើសុំឲ្យមន្ត្រីជំនាញចុះត្រួតពិនិត្យជាក់ស្តែង។