បរិយាយ

យោងលើ ប្រកាសលេខ “ធ៩-៩៩-១០០ ប្រក” ស្តីពីការគ្រប់គ្រង អាជីវកម្មត្បូងថ្ម និងលោហធាតុមានតំលៃ បុគ្គល ឬក្រុមបុគ្គលដែលមានអាយុចាប់ពី១៨ឆ្នាំឡើង មានទីលំនៅ និងទីតាំងអាជីវកម្មច្បាស់លាស់ ហើយចង់ធ្វើអាជីវកម្មត្បូងថ្ម និងលោហធាតុមានតំលៃ ត្រូវស្នើសុំ លិខិតអនុញ្ញាតិ អោយប្រកបអាជីវកម្មត្បូងថ្ម និងលោហធាតុមានតំលៃ ពីធនាគារជាតិកម្ពុជា។

លិខិតអនុញ្ញាតិនេះជាការតម្រូវ មុននឹងអតិថិជនអាចធ្វើការកែច្នៃ ទិញ លក់ និង នាំចេញ នាំចូលនូវ មាសដុំ និងគ្រឿងអលង្ការជាត្បូងថ្ម និងលោហធាតុមានតំលៃបាន។

កន្លែងដាក់ពាក្យស្នើសុំ

ធនាគារជាតិកម្ពុជា មិនមានបញ្ជរច្រកចេញចូលតែមួយទេ តែការិយាល័យអត្រាប្តូរប្រាក់ នៃនាយកដ្ឋានគ្រប់គ្រងការប្តូរប្រាក់ ដែលមានអាស័យដ្ឋានស្ថិតនៅក្នុងអាគារធនាគារជាតិកម្ពុជា ជាការិយាល័យជំនាញទទួលបន្ទុកផ្តល់ពត៌មាន និងសម្របសម្រួលក្នុងការផ្តល់សេវាកម្មក្នុងការចេញលិខិតអនុញ្ញាតិខាងលើដល់អតិថិជន។ អតិថិជនអាចទំនាក់ទំនងមកការិយាល័យនេះសំរាប់ការដាក់ពាក្យនិងឯកសារស្នើសុំ បង់ប្រាក់កម្រៃសេវា​និងទទួលលិខិតអនុញ្ញាតដែលចេញដោយធនាគារជាតិកម្ពុជា ។

ការិយាល័យ អត្រាប្តូរប្រាក់ នៃនាយកដ្ឋានគ្រប់គ្រងការប្តូរប្រាក់៖

ធនាគារជាតិកម្ពុជា

អាគារលេខ ២២-២៤ មហាវិថីព្រះនរោត្តម ក្រុងភ្នំពេញ ព្រះរាជាណាចក្រកម្ពុជា

ទូរស័ព្ទ: (855-23) 722 563, 722 221

វែបសាយ:      http://www.nbc.org.kh

សំគាល់ 1

អតិថិជនអាចទំនាក់ទំនងទៅការិយាល័យ អត្រាប្តូរប្រាក់ នៃនាយកដ្ឋានគ្រប់គ្រងការប្តូរប្រាក់​ ដើម្បីសុំគម្រូពាក្យស្នើសុំ។​

សំគាល់ 2

អតិថិជនអាចចាត់តំណាងមកដាក់ពាក្យស្នើសុំ តែត្រូវឲ្យមានលិខិតប្រគល់សិទ្ធ ឬលិខិតឧទ្ទេសនាម ។ អតិថិជនត្រូវបង់កម្រៃ១លានរៀល សំរាប់សេវាកម្មត្រួតពិនិត្យឯកសារ។ បង្កាន់ដៃបង់ប្រាក់មួយច្បាប់នឹងត្រូវប្រគល់មកអតិថិជន​ និងមួយច្បាប់ទៀតត្រូវភ្ជាប់ជាមួយនឹងសំណុំឯកសារពាក្យស្នើសុំ។

​

ឯកសារអមភ្ជាប់សម្រាប់ការស្នើសុំលិខិតអនុញ្ញាតការនាំចូលឧបករណ៏មាត្រាសាស្រ្ត និងស្តង់ដារមាត្រាសាស្រ្តមាន៖

• វិញ្ញាបនបត្រចុះបញ្ជីពាណិជ្ចកម្ម
• លិខិតបញ្ជាក់ទីតាំងអាជីវកម្ម ចេញដោយអាជ្ញាធរមានសមត្ថកិច្ច
• លក្ខន្តិកៈក្រុមហ៊ុន

រាល់ឯកសារភ្ជាប់ជាច្បាប់ចម្លង ដូចជា អត្តសញ្ញាណប័ណ្ណ លិខិតឆ្លងដែន វិញ្ញាបនបត្រ គ្រប់ប្រភេទត្រូវភ្ជាប់ ឬបង្ហាញច្បាប់ដើមដល់មន្ត្រីទទួលឯកសារ ឬត្រូវមានសេចក្តីបញ្ជាក់លើឯកសារថតចម្លងទាំងនោះដោយសាលារាជធានី ខេត្ត។

សំគាល់ 3

ការអនុវត្តនិតិវីធីផ្ទៃក្នុងត្រូវបានចាប់ផ្តើមពីការិយាល័យ អត្រាប្តូរប្រាក់ និងឆ្លងកាត់តាមឋានានុក្រមមួយចំនួនដែលមានកំនត់ក្នុងច្បាប់។ មុននឹងឈានដល់សេចក្តីសំរេចណាមួយ មន្ត្រីជំនាញអាចនឹងទំនាក់ទំនងទៅអតិថិជនដោយផ្ទាល់ សំរាប់ការបំពេញបន្ថែម​ចាំបាច់ណាមួយដែលត្រូវការសំរាប់ភាពគ្រប់គ្រាន់នៃការស្នើសុំដូចជាតម្រូវឲ្យអតិថិជនយកឯកសារបន្ថែមមកផ្តល់ជូនមន្រ្តីជំនាញជាដើម។

សំគាល់ 4

បន្តាប់ពីការចេញសេចក្តីសម្រេចអនុញ្ញាតិលើពាក្យស្នើសុំ មន្ត្រីជំនាញនឹងទាក់ទងទៅអតិថិជនឲ្យមកបង់កម្រៃសំរាប់សេវានៃការចេញលិខិតអនុញ្ញាត ២លានរៀល។

សំគាល់ 5

លិខិតអនុញ្ញាតនេះ មានសុពលភាព១២ខែ ។ ពេលមកទទួលយកលិខិតអនុញ្ញាត អតិថិជនគួរភ្ជាប់មកជាមួយអត្តសញ្ញាណប័ណ្ណ ឬលិខិតសំគាល់ខ្លួនផ្សេងៗ រួមជាមួយនឹងបង្កាន់ដៃទទួលពាក្យ/បង្កាន់ដៃបង់ប្រាក់។

អតិថិជនដែលមានលិខិតអនុញ្ញាតិនេះ ហើយចង់ធ្វើការនាំចេញ នាំចូលនូវ មាសដុំ និងគ្រឿងអលង្ការជាត្បូងថ្ម និងលោហធាតុមានតំលៃ ត្រូវបន្តធ្វើការស្នើសុំ លិខិតអនុញ្ញាតការនាំចេញ នាំចូល ពីធនាគារជាតិកម្ពុជា។