បរិយាយ

ម៉ាកមានដូចជា៖ ម៉ាកសំរាប់ទំនិញ (ពាណិជ្ជសញ្ញា) ម៉ាកសំរាប់សេវា (សេវាសញ្ញា) និងពាណិជ្ជនាមដែលជាឈ្មោះ ឬសញ្ញាសំគាល់បញ្ជាក់ពីភាពខុសគ្នានៃសហគ្រាសនីមួយៗ ជាដើម។

សិទ្ធផ្តាច់មុខក្នុងការប្រើប្រាស់ម៉ាក ត្រូវបានទទួលស្គាល់តាមរយៈការចុះបញ្ជីម៉ាក។ ការចុះបញ្ជីម៉ាកត្រូវធ្វើនៅក្រសួងពាណិជ្ជកម្ម តាមរយៈនាយកដ្ឋានកម្មសិទ្ធិបញ្ញា។ តាមរយៈការចុះបញ្ជីម៉ាក អតិថិជននឹងទទួលបានវិញ្ញាបនប័ត្របញ្ជាក់ការចុះបញ្ជីម៉ាក និង ការបោះពុម្ភផ្សាយម៉ាកនៅក្នុងព្រឹត្តិបត្តផ្លូវការរបស់ក្រសួងពាណិជ្ជកម្ម។ មិនមែនគ្រប់ម៉ាកទាំងអស់ សុទ្ធតែអាចចុះបញ្ជីដើម្បីទទួលបានកិច្ចការពារនោះទេ។ មាត្រា៤ នៃច្បាប់ស្តីពីម៉ាក ពាណិជ្ជនាម និងអំពើនៃ ការប្រកួតប្រជែងមិនស្មោះត្រង់ មានកំណត់ពីម៉ាកមួយចំនួនដែលមិនអាចចុះបញ្ជីបាន។ ច្បាប់នេះក៏មានចែងច្បាស់ពីសិទ្ធដែលទទួលបានតាមរយៈការចុះបញ្ជីម៉ាក ដូចជាផលិត​ នាំចេញ នាំចូល និងចែកចាយជាដើម។    

កន្លែងដាក់ពាក្យស្នើសុំ

នាយកដ្ឋានកម្មសិទ្ធិបញ្ញា ដែលស្ថិតនៅក្នុងទីតាំង៖

ទីស្តីការក្រសួងពាណិជ្ជកម្ម

លេខ ១៩-៦១ ផ្លូវក្រសួងពាណិជ្ជកម្ម (ផ្លូវ១១៣បេ) ភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ

Tel: +855 23 866115 / +855 12 826166 / +855 11 873191

Email: dipr.moc@gmail.com

Website: http://www.cambodiaip.gov.kh/​

Note 1

អតិថិជនអាចទាញយកគម្រូសំណុំពាក្យស្នើពីគេហទំព័ររបស់នាយកដ្ឋានកម្មសិទ្ធិបញ្ញា។ ពាក្យស្នើសុំត្រូវធ្វើជាភាសាខ្មែរ ឬអង់គ្លេស។​ ពាក្យស្នើសុំមួយ អាចធ្វើសម្រាប់ការស្នើសុំចុះបញ្ជីម់ាកមួយ ចំពោះទំនិញ ឬសេវាក្នុងចំណាត់ថ្នាក់មួយ ឬច្រើននៃចំណាត់ថ្នាក់អន្តរជាតិ។

Note 2

កម្រៃសម្រាប់ការដាក់ពាក្យស្នើសុំចំនួន ៣ម៉ឺនរៀល

Note 3

អតិថិជនដែលជាម្ចាស់ម៉ាកអាចចាត់អ្នកតំណាង ឬភ្នាក់ងារតំណាងស្របច្បាប់ណាមួយដែលទទួលស្គាល់ដោយក្រសួងពាណិជ្ជកម្ម មកធ្វើការងារស្នើសុំជំនួស តែត្រូវឲ្យមានលិខិតប្រគល់សិទ្ធឲ្យបុគ្គលនោះជាតំណាងស្របច្បាប់របស់ខ្លួន (Power Attorney and Deed of Substitution letters)។

ករណីឯកសារអមភ្ជាប់ជាមួយពាក្យស្នើសុំប្រើប្រាស់ភាសាណាមួយក្រៅពីភាសាខ្មែរ ឬអង់គ្លេស ត្រូវភ្ជាប់មកជាមួយនូវការបកប្រែជាភាសាខ្មែរ ឬអង់គ្លេស​។ ​ឯកសារអមភ្ជាប់ទាំងនេះរួមមានដូចជា៖

·        គំរូម៉ាក (specimen of mark)

·        បញ្ជីទំនិញ ឬសេវាដែលត្រូវចុះបញ្ជី ដោយរាយលំអិតតាមក្រុមមុខទំនិញទៅតាមចំណាត់ថ្នាក់អន្តរជាតិ (specification of goods/service)

Note 4

ក្នុងតំណាក់កាលនៃការអនុវត្តនិតិវិធីផ្ទៃក្នុង នាយកដ្ឋានកម្មសិទ្ធិបញ្ញាមានចេញជូនអ្នកដាក់ពាក្យនូវលិខិតទទួលស្គាល់ភាពគ្រប់គ្រាន់និងត្រឹមត្រូវនៃសំណុំពាក្យស្នើសុំ។

Note 5

មានបញ្ជាក់ពីកាលបរិច្ឆេទសម្រាប់ការបង់កម្រៃ។

Note 6

ថ្លៃសំរាប់ការចុះបញ្ជីម៉ាក ២៦ម៉ឺនរៀល និងថ្លៃសំរាប់ការបោះពុម្ភផ្សាយម៉ាកពាណិជ្ជកម្មចាប់ពី៦ម៉ឺនរៀល រហូតដល់៦០ម៉ឺនរៀលទៅតាមទំហំនៃការបោះពុម្ភ

Note 7

ម៉ាកដែលបានចុះបញ្ជីហើយ មានសុពលភាព១០ឆ្នាំ ចាប់ពីកាលបរិច្ឆេទនៃការទទួលពាក្យស្នើសុំចុះបញ្ជី។ ការស្នើសុំចុះបញ្ជីម៉ាកមួយ អាចធ្វើសាជាថ្មីសម្រាប់រយៈពេល១០ឆ្នាំម្តង។ ការអនុគ្រោះចំពោះការយឺតយ៉ាវក្នុងការចុះបញ្ជីសាជាថ្មី ត្រូវបានអនុញ្ញាតត្រឹមរយៈពេល៦ខែ បន្ទាប់ពីផុតសុពលភាព។

វិញ្ញាបនប័ត្របញ្ជាក់ការចុះបញ្ជីម៉ាក ជាការតម្រូវដើម្បីទទួលបានសិទ្ធនាំចូលទំនិញផ្តាច់មុខលើម៉ាក។