បរិយាយ

សំរាប់ការធ្វើអាជីវកម្មនាំចេញ / នាំចូល សត្វព្រៃ      គ្រាប់ពូជរុក្ខជាតិព្រៃ ឬប្រភេទរុក្ខជាតិព្រៃ អតិថិជនត្រូវធ្វើការស្នើសុំនូវប្រភេទលិខិតអនុញ្ញាតិដូចខាងក្រោម៖

·        លិខិតអនុញ្ញាតជាគោលការណ៏សំរាប់ការនាំចេញ / នាំចូល

·        លិខិតអនុញ្ញាតសំរាប់ការនាំចេញ / នាំចូល (សាយតេស)

·        លិខិតអនុញ្ញាតការដឹកជញ្ជូន (សំរាប់ការនាំចេញ / នាំចូល)

ឯកសារនេះបញ្ជាក់ពីការអនុវត្តនិតិវិធីរបស់អតិថិជនក្នុងការស្នើសុំ លិខិតអនុញ្ញាតសាយតេសសំរាប់ការនាំចេញ/នាំចូលសត្វព្រៃ គ្រាប់ពូជរុក្ខជាតិព្រៃ ឬប្រភេទរុក្ខជាតិព្រៃ  ដែលជាការតម្រូវមុននឹងធ្វើការនាំចេញ / នាំចូល ។

ដើម្បីមានសិទ្ធក្នុងការស្នើសុំលិខិតអនុញ្ញាតសាយតេសសំរាប់ការនាំចេញ/នាំចូលសត្វព្រៃ គ្រាប់ពូជរុក្ខជាតិព្រៃ ឬប្រភេទរុក្ខជាតិព្រៃ  អតិថិជនត្រូវមានការអនុញ្ញាតជាគោលការណ៏សំរាប់ការនាំចេញ នាំចូលពីក្រសួងកសិកម្មសិនតាមរយៈការស្នើសុំលិខិតអនុញ្ញាតជាគោលការណ៏សំរាប់ការនាំចេញ / នាំចូលនៅរដ្ឋបាលព្រៃឈើ។

កន្លែងដាក់ពាក្យស្នើសុំ

រដ្ឋបាលព្រៃឈើ មិនមានច្រកចេញចូលតែមួយទេ ហើយក៏មិនស្ថិតនៅក្នុងទីស្តីការក្រសួងកសិកម្មដែរ។

ន. សត្វព្រៃ និងជីវចម្រុះ ជានាយកដ្ឋានជំនាញក្នុងការផ្តល់សេវាកម្មទៅលើការចេញប្រភេទលិខិតអនុញ្ញាតិខាងលើ។​ រាល់ការទទួលគំរូពាក្យស្នើសុំ ការដាក់ពាក្យ ការបង់កម្រៃសេវា និងការទទួលលិខិតគឺធ្វើនៅនាយកដ្ឋានដោយផ្ទាល់ ដោយនាយកដ្ឋានមានការិ.រដ្ឋបាលនិងការិយាល័យហិរញ្ញវត្ថុ​ ដែលស្ថិតនៅក្នុងទីតាំងនាយកដ្ឋានតែមួយ។

ន.​ សត្វព្រៃ និងជីវចម្រុះ មានទីតាំងក្នុងរដ្ឋបាលព្រៃឈើ ។

រដ្ឋបាលព្រៃឈើ ៖

លេខ៤០ មហាវិថីព្រះនរោត្តម សង្កាត់ផ្សារកណ្ដាល២ ខ័ណ្ឌដូនពេញ ភ្នំពេញ

ទូរស័ព្ទ:        023 212 201

វែបសាយ:      http://www.forestry.gov.kh/

សំគាល់ 1

ពាក្យស្នើសុំមិនមែនជា Form ទេ តែជាលិខិតស្នើសុំ ដែលមានគម្រូស្រាប់នៅរដ្ឋបាលព្រៃឈើ។ អតិថិជនអាចទទួលគំរូលិខិតស្នើសុំនៅការិ.រដ្ឋបាល នៃន. សត្វព្រៃ និងជីវចម្រុះ។

សំគាល់ 2

អតិថិជនអាចចាត់តំណាងមកដាក់ពាក្យស្នើសុំ តែត្រូវឲ្យមានលិខិតប្រគល់សិទ្ធ ឬលិខិតឧទ្ទេសនាម។

​

ឯកសារភ្ជាប់ រួមមាន៖

• លិខិតអនុញ្ញាតជាគោលការណ៏សំរាប់ការនាំចេញ/នាំចូលសត្វព្រៃ គ្រាប់ពូជរុក្ខជាតិព្រៃ ឬប្រភេទរុក្ខជាតិព្រៃ (ច្បាប់ដើម)
• វិក័យប័ត្រពាណិជ្ជកម្ម (ច្បាប់ដើម)
• កិច្ចសន្យាទិញលក់ (ច្បាប់ដើមឬច្បាប់ចម្លង)

សំគាល់ 3

ការអនុវត្តនិតិវីធីផ្ទៃក្នុងត្រូវបានចាប់ផ្តើមពីនាយកដ្ឋានជំនាញ និងឆ្លងកាត់តាមឋានានុក្រមមួយចំនួនដែលមានកំនត់ក្នុងច្បាប់រហូតដល់មានការអនុម័តយល់ព្រមជាចុងក្រោយ។ ក្នុងតំណាក់កាលនេះ រដ្ឋបាលព្រៃឈើមានធ្វើសំយោគលទ្ធផលវាយតម្លៃ និងលើកជាសំណើរភ្ជាប់ជាមួយនឹងឯកសារពាក្យស្នើសុំរបស់អតិថិជន ដើម្បីសុំការអនុម័តយល់ព្រមពីក្រសួងកសិកម្ម។

សំគាល់ 4

តម្លៃសេវាកម្ម ដែលបានកំណត់ក្នុងប្រកាសរួមរបស់ក្រសួងសេដ្ឋកិច្ច​​ និងក្រសួងកសិកម្ម ស្តីពីការផ្តល់សេវាសាធារណៈរបស់ក្រសួងកសិកម្ម គឺ១លានរៀល។

សំគាល់ 5

ពេលមកទទួលយកលិខិតអនុញ្ញាតិ អតិថិជនគួរភ្ជាប់មកជាមួយអត្តសញ្ញាណប័ណ្ណ ឬលិខិតសំគាល់ខ្លួនផ្សេងៗ រួមជាមួយនឹងបង្កាន់ដៃទទួលពាក្យ។ លិខិតអនុញ្ញាតសាយតេសសំរាប់ការនាំចេញ/នាំចូលសត្វព្រៃ គ្រាប់ពូជរុក្ខជាតិព្រៃ ឬប្រភេទរុក្ខជាតិព្រៃ មានបញ្ជាក់ពីយថាប្រភេទ បរិមាណ នៃទំនិញ និងសុពលភាពរបស់លិខិត(តាមការកំណត់ក្នុងលិខិតអនុញ្ញាត)។