បរិយាយ

អតិថិជនអនុវត្តនិតិវិធីស្នើសុំតែមួយ ដើម្បីបានលិខិតអនុញ្ញាតសំរាប់ការនាំចេញ និងលិខិតអនុញ្ញាតសំរាប់ការនាំចូល វត្ថុសិល្បៈសម័យថ្មី ដូចជារូបចំលាក់អប្សរា វិស្ណុ ព្រះពុទ្ធដែលឆ្លាក់ពីឈើ និងគ្រឿងសង្ហារឹមដែលមានឆ្លាក់ក្បាច់ដូចជាតុ ទូ កីដំបាញ ជាដើម។

ការតម្រូវក្នុងការស្នើសុំនេះគឺអនុលោមទៅតាមច្បាប់ស្តីពី កិច្ចការពារ បេតិកភ័ណ្ឌវប្បធម៌។ លិខិតអនុញាត្តិការនាំចេញ នាំចូលវត្ថុសិល្បៈនេះតែងតែជាការតម្រូវរបស់ស្ថាប័នគយនៅតាមច្រកព្រំដែន។ មានករណីខ្លះដែលអតិថិជនដឹកទំនិញដែលជាវត្ថុសិល្បៈទៅដល់មាត់ច្រកព្រំដែនដោយគ្មានលិខិតអនុញាត្តិការនាំចេញ នាំចូលវត្ថុសិល្បៈ។ ចំពោះករណីបែបនេះ ស្ថាប័នគយនឹងតម្រូវឲ្យអតិថិជនមកធ្វើការស្នើសុំការអនុញ្ញាត្តពីក្រសួងវប្បធម៌ជាមុន។

កន្លែងដាក់ពាក្យស្នើសុំ

ក្រសួងវប្បធម៌ និងវិចិត្រសិល្បៈមិនមានបញ្ជរច្រកចេញចូលតែមួយទេតែការិយាល័យ និងនាយកដ្ឋានជំនាញ ស្ថិតនៅក្នុងទីស្តីការក្រសួង ដែលនឹងផ្តល់ពត៌មានចាំបាច់ និងសម្របសម្រួលក្នុងការផ្តល់សេវាកម្មដល់អតិថិជនទាក់ទងនឹងការចេញលិខិតអនុញ្ញាតដោយអង្គភាពរបស់ខ្លួន រួមទាំងកិច្ចការទទួលពាក្យនិងឯកសារស្នើសុំ ចេញបង្កាន់ដៃទទួលពាក្យ ទទួលប្រាក់កម្រៃសេវា ចេញបង្កាន់ដៃទទួលប្រាក់ និងប្រគល់លិខិតអនុញ្ញាតទៅឲ្យអតិថិជន។

ការិ. ត្រួតពិនិត្យ អាជីវកម្មវត្ថុសិល្បៈ នៃន.បុរាណវត្ថុ នៃអគ្គនាយកដ្ឋានបេតិកភណ្ឌ ដែលស្ថិតនៅក្នុងទីតាំង៖

ទីស្តីការក្រសួងវប្បធម៌ និងវិចិត្រសិល្បៈ

អាគារលេខ ២២៧ មហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ

ទូរស័ព្ទ: 023218148

វែបសាយ:      http://www.mcfa.gov.kh/

សំគាល់ 1

អតិថិជនអាចទំនាក់ទំនងទៅការិ. ត្រួតពិនិត្យ អាជីវកម្មវត្ថុសិល្បៈ នៃន.បុរាណវត្ថុ នៃអគ្គនាយកដ្ឋានបេតិកភណ្ឌដោយផ្ទាល់​ ដើម្បីសុំគម្រូពាក្យស្នើសុំ​ និងគំរូឯកសារអមភ្ជាប់ដែលរៀបចំជាសំណុំឯកសារពាក្យស្នើសុំរួចជាស្រេច សំរាប់បំពេញ។

សំគាល់ 2

អតិថិជនអាចចាត់តំណាងមកដាក់ពាក្យស្នើសុំ តែត្រូវឲ្យមានលិខិតប្រគល់សិទ្ធ ឬលិខិតឧទ្ទេសនាម ។

​

ឯកសារភ្ជាប់សម្រាប់ការស្នើសុំនាំចេញមានដូចជា៖

• ពាក្យសុំត្រួតពិនិត្យវត្ថុសិល្បៈនាំចេញ
• កំណត់ហេតុពិនិត្យវត្ថុសិល្បៈនាំចេញ
• បញ្ជីរូបភាពវត្ថុសិល្បៈនាំចេញ
• វិញ្ញាបនបត្រចុះបញ្ជីពាណិជ្ចកម្ម និងវិញ្ញាបនបត្រចុះបញ្ជីអាករលើតម្លៃបន្ថែម Packaging list, Invoice (ករណីក្រុមហ៊ុនប្រតិបត្តករធំៗ) និងឯកសារបញ្ជាក់អត្តសញ្ញាណរបស់អតិថិជន
• អតិថិជនត្រូវយកវត្ថុសិល្បៈដែលស្នើនាំចេញមកក្រសួងសំរាប់ឲ្យមន្ត្រីជំនាញត្រួតពិនិត្យផ្ទាល់សំរាប់ការនាំចេញនោះ

ឯកសារភ្ជាប់សម្រាប់ការស្នើសុំនាំចូលមានដូចជា៖

• ពាក្យសុំត្រួតពិនិត្យវត្ថុសិល្បៈនាំចូល
• កំណត់ហេតុពិនិត្យវត្ថុសិល្បៈនាំចូល
• បញ្ជីរូបភាពវត្ថុសិល្បៈនាំចូល
• វិញ្ញាបនបត្រចុះបញ្ជីពាណិជ្ចកម្ម និងវិញ្ញាបនបត្រចុះបញ្ជីអាករលើតម្លៃបន្ថែម Packaging list, Invoice (ករណីក្រុមហ៊ុនប្រតិបត្តករធំៗ) និងឯកសារបញ្ជាក់អត្តសញ្ញាណរបស់អតិថិជន

រាល់ឯកសារភ្ជាប់ជាច្បាប់ចម្លង ដូចជា អត្តសញ្ញាណប័ណ្ណ លិខិតឆ្លងដែន វិញ្ញាបនបត្រ គ្រប់ប្រភេទត្រូវភ្ជាប់ ឬបង្ហាញច្បាប់ដើមដល់មន្ត្រីទទួលឯកសារ ឬត្រូវមានសេចក្តីបញ្ជាក់លើឯកសារថតចម្លងទាំងនោះដោយសាលារាជធានី ខេត្ត។

សំគាល់ 3

ការអនុវត្តនិតិវីធីផ្ទៃក្នុងត្រូវបានចាប់ផ្តើមពីការិយាល័យជំនាញ និងឆ្លងកាត់តាមឋានានុក្រមមួយចំនួនដែលមានកំនត់ក្នុងច្បាប់។ មុននឹងឈានដល់សេចក្តីសំរេចណាមួយ មន្ត្រីជំនាញអាចនឹងទំនាក់ទំនងទៅអតិថិជនដោយផ្ទាល់ សំរាប់ការបំពេញបន្ថែម​ចាំបាច់ណាមួយដែលត្រូវការសំរាប់ភាពគ្រប់គ្រាន់នៃការស្នើសុំដូចជាតម្រូវឲ្យអតិថិជនយកឯកសារបន្ថែមមកផ្តល់ជូនមន្រ្តីជំនាញជាដើម។

សំគាល់ 4

បន្តាប់ពីការចេញសេចក្តីសម្រេចអនុញ្ញាតិលើពាក្យស្នើសុំ មន្ត្រីជំនាញនឹងទាក់ទងទៅអតិថិជនឲ្យមកបង់កម្រៃសេវាកម្ម។ តម្លៃសេវា គិតតាមទំហំខ្នាត និងបរិមាណតិច ឬច្រើន ដូចមានចែងក្នុងតារាងឧបសម្ព័ន្ធភ្ជាប់នឹងប្រកាសរួមលេខ ៩៨៧ សហវ.ប្រក ស្តីពីការផ្តល់សេវាសាធារណៈរបស់ក្រសួងវប្បធម៌ និងវិចិត្រសិល្បៈ។

សំគាល់ 5

មានបញ្ជាក់យថាប្រភេទ ទំហំ បរិមាណនៃវត្ថុសិល្បៈដែលត្រូវបានអនុញ្ញាត និងសុពលភាពនៃលិខិតអនុញ្ញាត (១ខែ)។ ពេលមកយកលិខិតអនុញ្ញាត ​ អតិថិជនគួរភ្ជាប់មកជាមួយអត្តសញ្ញាណប័ណ្ណ ឬលិខិតសំគាល់ខ្លួនផ្សេងៗ រួមជាមួយនឹងបង្កាន់ដៃទទួលពាក្យ/បង្កាន់ដៃបង់ប្រាក់។