បរិយាយ

អតិថិជនដែលទទួលបានលិខិតអនុញ្ញាតិ អោយប្រកបអាជីវកម្មត្បូងថ្ម និងលោហធាតុមានតំលៃ ត្រូវបន្តស្នើសុំ លិខិតអនុញ្ញាតការនាំចេញ នាំចូល ពីធនាគារជាតិកម្ពុជាមុននឹងអាចធ្វើការនាំចេញ នាំចូលនូវ មាសដុំ និងគ្រឿងអលង្ការជាត្បូងថ្ម និងលោហធាតុមានតំលៃបាន។

កន្លែងដាក់ពាក្យស្នើសុំ

ធនាគារជាតិកម្ពុជា មិនមានបញ្ជរច្រកចេញចូលតែមួយទេ តែការិយាល័យអត្រាប្តូរប្រាក់ នៃនាយកដ្ឋានគ្រប់គ្រងការប្តូរប្រាក់ ដែលមានអាស័យដ្ឋានស្ថិតនៅក្នុងអាគារធនាគារជាតិកម្ពុជា ជាការិយាល័យជំនាញទទួលបន្ទុកផ្តល់ពត៌មាន និងសម្របសម្រួលក្នុងការផ្តល់សេវាកម្មក្នុងការចេញលិខិតអនុញ្ញាតិខាងលើដល់អតិថិជន។ អតិថិជនអាចទំនាក់ទំនងមកការិយាល័យនេះសំរាប់ការដាក់ពាក្យនិងឯកសារស្នើសុំ បង់ប្រាក់កម្រៃសេវា​និងទទួលលិខិតអនុញ្ញាតដែលចេញដោយធនាគារជាតិកម្ពុជា ។

ការិយាល័យ អត្រាប្តូរប្រាក់ នៃនាយកដ្ឋានគ្រប់គ្រងការប្តូរប្រាក់៖

ធនាគារជាតិកម្ពុជា

អាគារលេខ ២២-២៤ មហាវិថីព្រះនរោត្តម ក្រុងភ្នំពេញ ព្រះរាជាណាចក្រកម្ពុជា

ទូរស័ព្ទ: (855-23) 722 563, 722 221

វែបសាយ:      http://www.nbc.org.kh

សំគាល់ 1

អតិថិជនអាចទំនាក់ទំនងទៅការិយាល័យ អត្រាប្តូរប្រាក់ នៃនាយកដ្ឋានគ្រប់គ្រងការប្តូរប្រាក់​ ដើម្បីសុំគម្រូប្រតិវេទន៏ (Declaration Form)។​

សំគាល់ 2

អតិថិជនអាចចាត់តំណាងមកដាក់ពាក្យស្នើសុំ តែត្រូវឲ្យមានលិខិតប្រគល់សិទ្ធ ឬលិខិតឧទ្ទេសនាម ។

​

ឯកសារអមភ្ជាប់សម្រាប់ការស្នើសុំលិខិតអនុញ្ញាតការនាំចូលឧបករណ៏មាត្រាសាស្រ្ត និងស្តង់ដារមាត្រាសាស្រ្តមាន៖

• វិញ្ញាបនបត្រចុះបញ្ជីពាណិជ្ចកម្ម
• លិខិតបញ្ជាក់ទីតាំងអាជីវកម្ម ចេញដោយអាជ្ញាធរមានសមត្ថកិច្ច
• លក្ខន្តិកៈក្រុមហ៊ុន
• លិខិតអនុញ្ញាតិ អោយប្រកបអាជីវកម្មត្បូងថ្ម និងលោហធាតុមានតំលៃ
• លិខិតព្រមព្រៀង ឬកិច្ចសន្យាទិញ លក់ជាមួយក្រុមហ៊ុនបរទេស

រាល់ឯកសារភ្ជាប់ជាច្បាប់ចម្លង ដូចជា អត្តសញ្ញាណប័ណ្ណ លិខិតឆ្លងដែន វិញ្ញាបនបត្រ គ្រប់ប្រភេទត្រូវភ្ជាប់ ឬបង្ហាញច្បាប់ដើមដល់មន្ត្រីទទួលឯកសារ ឬត្រូវមានសេចក្តីបញ្ជាក់លើឯកសារថតចម្លងទាំងនោះដោយសាលារាជធានី ខេត្ត។

សំគាល់ 3

ការអនុវត្តនិតិវីធីផ្ទៃក្នុងត្រូវបានចាប់ផ្តើមពីការិយាល័យ អត្រាប្តូរប្រាក់ និងឆ្លងកាត់តាមឋានានុក្រមមួយចំនួនដែលមានកំនត់ក្នុងច្បាប់។ មុននឹងឈានដល់សេចក្តីសំរេចណាមួយ មន្ត្រីជំនាញអាចនឹងទំនាក់ទំនងទៅអតិថិជនដោយផ្ទាល់ សំរាប់ការបំពេញបន្ថែម​ចាំបាច់ណាមួយដែលត្រូវការសំរាប់ភាពគ្រប់គ្រាន់នៃការស្នើសុំដូចជាតម្រូវឲ្យអតិថិជនយកឯកសារបន្ថែមមកផ្តល់ជូនមន្រ្តីជំនាញជាដើម។

សំគាល់ 4

បន្តាប់ពីការចេញសេចក្តីសម្រេចអនុញ្ញាតិលើពាក្យស្នើសុំ មន្ត្រីជំនាញនឹងទាក់ទងទៅអតិថិជនឲ្យមកបង់កម្រៃសំរាប់សេវានៃការចេញលិខិតអនុញ្ញាត ២លានរៀល។

សំគាល់ 5

លិខិតអនុញ្ញាតនេះ មានសុពលភាព៣០ថ្ងៃ។ ពេលមកទទួលយកលិខិតអនុញ្ញាត អតិថិជនគួរភ្ជាប់មកជាមួយអត្តសញ្ញាណប័ណ្ណ ឬលិខិតសំគាល់ខ្លួនផ្សេងៗ រួមជាមួយនឹងបង្កាន់ដៃទទួលពាក្យ/បង្កាន់ដៃបង់ប្រាក់។