បរិយាយ

សំរាប់ការធ្វើអាជីវកម្មនាំចេញ / នាំចូល សត្វព្រៃ      គ្រាប់ពូជរុក្ខជាតិព្រៃ ឬប្រភេទរុក្ខជាតិព្រៃ អតិថិជនត្រូវធ្វើការស្នើសុំនូវប្រភេទលិខិតអនុញ្ញាតិដូចខាងក្រោម៖

·        លិខិតអនុញ្ញាតជាគោលការណ៏សំរាប់ការនាំចេញ / នាំចូល

·        លិខិតអនុញ្ញាតសំរាប់ការនាំចេញ / នាំចូល (សាយតេស)

·        លិខិតអនុញ្ញាតការដឹកជញ្ជូន (សំរាប់ការនាំចេញ / នាំចូល)

ឯកសារនេះបញ្ជាក់ពីការអនុវត្តនិតិវិធីរបស់អតិថិជនក្នុងការស្នើសុំ លិខិតអនុញ្ញាតជាគោលការណ៏សំរាប់ការនាំចេញ / នាំចូល  ដែលជាការតម្រូវមុននឹងធ្វើការស្នើសុំលិខិតអនុញ្ញាតនាំចេញ / នាំចូល ។ ការអនុវត្តនិតិវិធីរបស់អតិថិជនក្នុងការស្នើសុំ លិខិតអនុញ្ញាតជាគោលការណ៏សំរាប់ការនាំចេញ និងសំរាប់ការនាំចូលមានតំណាក់កាលដូចគ្នា លើកលែងតែការតម្រូវទៅលើចំនួន និងប្រភេទឯកសារភ្ជាប់។

កន្លែងដាក់ពាក្យស្នើសុំ

រដ្ឋបាលព្រៃឈើ មិនមានច្រកចេញចូលតែមួយទេ ហើយក៏មិនស្ថិតនៅក្នុងទីស្តីការក្រសួងកសិកម្មដែរ។

ន. សត្វព្រៃ និងជីវចម្រុះ ជានាយកដ្ឋានជំនាញក្នុងការផ្តល់សេវាកម្មទៅលើការចេញប្រភេទលិខិតអនុញ្ញាតិខាងលើ។​ រាល់ការទទួលគំរូពាក្យស្នើសុំ ការដាក់ពាក្យ ការបង់កម្រៃសេវា និងការទទួលលិខិតគឺធ្វើនៅនាយកដ្ឋានដោយផ្ទាល់ ដោយនាយកដ្ឋានមានការិ.រដ្ឋបាលនិងការិយាល័យហិរញ្ញវត្ថុ​ ដែលស្ថិតនៅក្នុងទីតាំងនាយកដ្ឋានតែមួយ។

ន.​ សត្វព្រៃ និងជីវចម្រុះ មានទីតាំងក្នុងរដ្ឋបាលព្រៃឈើ ។

រដ្ឋបាលព្រៃឈើ ៖

លេខ៤០ មហាវិថីព្រះនរោត្តម សង្កាត់ផ្សារកណ្ដាល២ ខ័ណ្ឌដូនពេញ ភ្នំពេញ

ទូរស័ព្ទ:        023 212 201

វែបសាយ:      http://www.forestry.gov.kh/

សំគាល់ 1

ពាក្យស្នើសុំមិនមែនជា Form ទេ តែជាលិខិតស្នើសុំ ដែលមានគម្រូស្រាប់នៅរដ្ឋបាលព្រៃឈើ។ អតិថិជនអាចទទួលគំរូលិខិតស្នើសុំនៅការិ.រដ្ឋបាល នៃន. សត្វព្រៃ និងជីវចម្រុះ។

សំគាល់ 2

អតិថិជនអាចចាត់តំណាងមកដាក់ពាក្យស្នើសុំ តែត្រូវឲ្យមានលិខិតប្រគល់សិទ្ធ ឬលិខិតឧទ្ទេសនាម។

​

ឯកសារភ្ជាប់សម្រាប់ស្នើសុំគោលការណ៏នាំចេញ រួមមាន៖

• វិញ្ញាបនបត្រចុះបញ្ជីពាណិជ្ចកម្ម អាករលើតម្លៃបន្ថែម ប័ណ្ណប៉ាតង់ លក្ខន្តិកៈក្រុមហ៊ុន និងឯកសារផ្សេងៗទៀតពាក់ព័ន្ធនឹងអត្តសញ្ញាណរបស់អ្នកស្នើសុំ(ច្បាប់ចម្លង)
• ប្រកាសស្តីពីការអនុញ្ញាតឲ្យបើកការដ្ឋានចិញ្ជឹមនិងបង្កាត់ពូជ (ច្បាប់ចម្លង)
• ឯកសារបញ្ជាក់ពីប្រភពស្របច្បាប់ ដូចជាឯកសារទិញលក់ ឬដេញថ្លៃ (ច្បាប់ចម្លង)
• វិញ្ញាបនបត្រភូតគាមអនាម័យ (ច្បាប់ចម្លង)

ឯកសារភ្ជាប់សម្រាប់ស្នើសុំគោលការណ៏នាំចូល រួមមាន៖

• វិញ្ញាបនបត្រចុះបញ្ជីពាណិជ្ចកម្ម អាករលើតម្លៃបន្ថែម ប័ណ្ណប៉ាតង់ លក្ខន្តិកៈក្រុមហ៊ុន និងឯកសារផ្សេងៗទៀតពាក់ព័ន្ធនឹងអត្តសញ្ញាណរបស់អ្នកស្នើសុំ(ច្បាប់ចម្លង)
• ឯកសារបញ្ជាក់ពីប្រភពស្របច្បាប់ ដូចជាឯកសារទិញលក់ ឬដេញថ្លៃ (ច្បាប់ដើមឬច្បាប់ចម្លង)
• វិញ្ញាបនបត្របញ្ជាក់បញ្ជីកាចេញដោយអាជ្ញាធរវិទ្យាសាស្រ្តនៃប្រទេសនាំចេញ (ច្បាប់ចម្លង)
• វិញ្ញាបនបត្រភូតគាមអនាម័យនៃប្រទេសនាំចេញ និងសំណាកគ្រាប់ពូជរុក្ខជាតិព្រៃ ឬប្រភេទរុក្ខជាតិព្រៃ (ច្បាប់ចម្លង)

រាល់ឯកសារភ្ជាប់ជាច្បាប់ចម្លង ដូចជា អត្តសញ្ញាណប័ណ្ណ លិខិតឆ្លងដែន វិញ្ញាបនបត្រ គ្រប់ប្រភេទត្រូវភ្ជាប់ ឬបង្ហាញច្បាប់ដើមដល់មន្ត្រីទទួលឯកសារ ឬត្រូវមានសេចក្តីបញ្ជាក់លើឯកសារថតចម្លងទាំងនោះដោយសាលារាជធានី ខេត្ត ក្រសួង​ ស្ថាប័នសាម៉ី។

សំគាល់ 3

ការអនុវត្តនិតិវីធីផ្ទៃក្នុងត្រូវបានចាប់ផ្តើមពីនាយកដ្ឋានជំនាញ និងឆ្លងកាត់តាមឋានានុក្រមមួយចំនួនដែលមានកំនត់ក្នុងច្បាប់រហូតដល់មានការអនុម័តយល់ព្រមជាចុងក្រោយ។ ក្នុងតំណាក់កាលនេះ រដ្ឋបាលព្រៃឈើមានធ្វើសំយោគលទ្ធផលវាយតម្លៃ និងលើកជាសំណើរសុំគោលការណ៏ ភ្ជាប់ជាមួយនឹងឯកសារពាក្យស្នើសុំរបស់អតិថិជនទៅក្រសួងកសិកម្ម។ បន្ទាប់ពីមានការឯកភាពយល់ព្រមអីពីក្រសួងទៅលើសំណើរសុំ ទើបរដ្ឋបាលព្រៃឈើអាចរៀបចំចេញលិខិតអនុញ្ញាតិជាគោលការណ៏សំរាប់ការនាំចេញ នាំចូលជូនអតិថិជន។ ក្រោយពីចេញលិខិតអនុញ្ញាតិនេះហើយ មន្ត្រីជំនាញនឹងទាក់ទងទៅអតិថិជនឲ្យមកទទួលលិខិត។

សំគាល់ 4

ពេលមកទទួលយកលិខិតអនុញ្ញាតិ អតិថិជនគួរភ្ជាប់មកជាមួយអត្តសញ្ញាណប័ណ្ណ ឬលិខិតសំគាល់ខ្លួនផ្សេងៗ រួមជាមួយនឹងបង្កាន់ដៃទទួលពាក្យ។ លិខិតអនុញ្ញាតិជាគោលការណ៏សំរាប់ការនាំចេញ / នាំចូល សត្វ និងរុក្ខជាតិព្រៃ មានបញ្ជាក់ពីយថាប្រភេទ បរិមាណ នៃទំនិញ និងសុពលភាពរបស់លិខិត (១ឆ្នាំ)។