បរិយាយ

ដើម្បីអនុវត្តសកម្មភាពប្រតិបត្តិការធនធានរ៉ែ ទាំងការសិក្សាបឋម (បុរេសនា) ការស្វែងរុករក និងការធ្វើអាជីវកម្មដូចជាជីកយករ៉ែ ធ្វើប្រព្រឹត្តិកម្ម ដឹកជញ្ជូន នាំចេញក្នុងគោលបំណងពាណិជ្ជកម្មជាដើម គឺតម្រូវឲ្យមាន អាជ្ញាប័ណ្ណធនធានរ៉ែ។

អតិថិជនដែលមានបំណងដាក់ពាក្យស្នើសុំអាជ្ញាប័ណ្ណធនធានរ៉ែ ត្រូវធ្វើការចុះបញ្ជី និងទទួលការឯកភាពយល់ព្រមលើឯកសារលទ្ធផលនៃការសិក្សាសមិទ្ធិលទ្ធភាពរបស់ខ្លួន ពីក្រសួងរ៉ែ និងថាមពលជាមុន។

ការដែលមានអាជ្ញាប័ណ្ណធនធានរ៉ែ ជាការតម្រូវចាំបាច់មុននឹងអតិថិជនអាចស្នើសុំទៅក្រសួងស្ថាប័នពាក់ព័ន្ធនូវលិខិតអនុញ្ញាតសម្រាប់ការនាំចេញធនធានរ៉ែក្នុងលក្ខណៈជាប្រភេទផលិតផលសំរេច ដូចជាខ្សាច់ស៊ីលីស និងថ្មបន្ទះ។

សម្រាប់ការនាំចេញធនធានរ៉ែធម្មជាតិគ្រប់ប្រភេទគឺមិនអនុញ្ញាតទេ (អនុក្រឹតលេខ ០៨ ស្តីពីការកំណត់គោលការណ៏វិនិយោគលើធនធានរ៉ែគ្រប់ប្រភេទ)។

អាជ្ញាប័ណ្ណធនធានរ៉ែ ដែលជាការតម្រូវចាំបាច់សម្រាប់ការនាំចេញនាំចូលមានពីរប្រភេទ៖ អាជ្ញាប័ណ្ណស្វែងរុករករ៉ែ និងអាជ្ញាប័ណ្ណឧស្សាហកម្មអាជីវកម្មធនធានរ៉ែ។  អតិថិជនត្រូវមានអាជ្ញាប័ណ្ណស្វែងរុករករ៉ែជាមុន ទើបអាចស្នើសុំអាជ្ញាប័ណ្ណឧស្សាហកម្មអាជីវកម្មធនធានរ៉ែបាន។

ឯកសារនេះបញ្ជាក់ពីការអនុវត្តនិតិវិធីរបស់អតិថិជនក្នុងការស្នើសុំអាជ្ញាប័ណ្ណឧស្សាហកម្មអាជីវកម្មធនធានរ៉ែ។ ចំពោះសំណើសុំធ្វើអាជីវកម្មធនធានរ៉ែ ត្រូវឆ្លងកាត់ច្រកចេញចូលតែមួយ នៃក្រុមប្រឹក្សាអភិវឌ្ឍន៍កម្ពុជា (ក.អ.ក)។

កន្លែងដាក់ពាក្យស្នើសុំ

រាល់ការទទួលគំរូពាក្យស្នើសុំ ការដាក់ពាក្យ ការបង់កម្រៃសេវា និងការទទួលលិខិតគឺធ្វើនៅលេខាធិការដ្ឋាននៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល។ អគ្គនាយកដ្ឋានរ៉ែមានទីតាំងនៅក្នុងទីស្តីការក្រសួងដែលមានអាស័យដ្ឋាន:

ក្រសួងរ៉ែ និងថាមពល៖ លេខ៧៩-៨៩, វិថី ប៉ាស្ទ័រ (៥១), សង្កាត់ផ្សារថ្មី៣ ខ័ណ្ឌដូនពេញ រាជធានីភ្នំពេញ កម្ពុជា

Tel: ០២៣​ ២១៩ ៥៧៤

E-mail: info@mme.gov.kh

វែបសាយ:      http://www.mme.gov.kh/

សំគាល់ 1

អតិថិជនមកទទួលពាក្យស្នើសុំចុះបញ្ជី Application Form ពីលេខាធិការដ្ឋាន របស់អគ្គនាយកដ្ឋានរ៉ែ។

សំគាល់ 2

អតិថិជនដែលជាប្រធានក្រុមប្រឹក្សាភិបាល ឬអភិបាលក្រុមហ៊ុនមកដាក់ពាក្យស្នើសុំ ។

​

ឯកសារភ្ជាប់ រួមមាន៖

• ឯកសារសិក្សាសមិទ្ធិលទ្ធភាពចុងក្រោយ
• ផែនការ ជីកយករ៉ែ ផែនការអណ្តូងរ៉ែ និងផែនការប្រព្រឹត្តិកម្ម
• របាយការណ៏ស្តីពីការវាយតម្លៃផលប៉ះពាល់បរិស្ថាន និងផែនការការពារបរិស្ថាន ដែលមានការបញ្ជាក់ពីក្រសួងបរិស្ថាន
• ផែនការស្តាការដា្ឋនជីកយករ៉ែឡើងវិញ និងថវិការបំរុងសំរាប់ការងារនេះ
• ផែនការអភិវឌ្ឍន៏សហគមន៏ (ការងារ បណ្តុះបណ្តាល ហេដ្ឋរចនាសម្ពន្ធ..)

សំគាល់ 3

ការអនុវត្តនិតិវីធីផ្ទៃក្នុងត្រូវបានចាប់ផ្តើមពីនាយកដ្ឋានជំនាញ និងឆ្លងកាត់តាមឋានានុក្រមមួយចំនួនដែលមានកំនត់ក្នុងច្បាប់រហូតដល់មានការអនុម័តយល់ព្រមជាចុងក្រោយ។

ក្រសួងរ៉ែ និងថាមពលបន្ទាប់ពីពិនិត្យនិងវាយតម្លៃលើសំណើរសុំអាជ្ញាបណ្ណនេះហើយ ក៏នឹងធ្វើសំយោគលទ្ធផលវាយតម្លៃ ហើយលើកជាយោបល់សុំការឯកភាព ភ្ជាប់ជាមួយនឹងឯកសារពាក្យស្នើសុំរបស់អតិថិជនទៅក្រុមប្រឹក្សាអភិវឌ្ឍន៍កម្ពុជា (ក.អ.ក)។

បន្ទាប់ពីមានការឯកភាពយល់ព្រមអីពីក្រុមប្រឹក្សាអភិវឌ្ឍន៍កម្ពុជា (ក.អ.ក) អគ្គនាយកដ្ឋានរ៉ែទាក់ទងទៅអតិថិជនឲ្យមកបង់កម្រៃសេវាសំរាប់ការចេញអាជ្ញាបណ្ណ។

សំគាល់ 4

តម្លៃកម្រៃអាជ្ញាបណ្ណ៨.៤លានរៀល ដែលបានកំណត់ក្នុងប្រកាសរួមរបស់ក្រសួងសេដ្ឋកិច្ច និងក្រសួងកសិកម្ម ស្តីពីការកំណត់ថ្លៃសំរាប់ការបង់ថ្លៃចុះបញ្ជី ពាក្យសុំ (កម្រៃអាជ្ញាបណ្ណ) ការពន្យាបន្ត និងផ្ទេរសិទ្ធអាជ្ញាបណ្ណរ៉ែ។

សំគាល់ 5

ពេលមកទទួលយកអាជ្ញាបណ្ណ អតិថិជនគួរភ្ជាប់មកជាមួយអត្តសញ្ញាណប័ណ្ណ ឬលិខិតសំគាល់ខ្លួនផ្សេងៗ រួមជាមួយនឹងបង្កាន់ដៃទទួលពាក្យ។

អាជ្ញាប័ណ្ណឧស្សាហកម្មអាជីវកម្មធនធានរ៉ែ មានសុពលភាព៥ឆ្នាំ ហើយអតិថិជនអាចស្នើសុំទៅក្រសួងស្ថាប័នពាក់ព័ន្ធនូវលិខិតអនុញ្ញាតសម្រាប់ការនាំចេញធនធានរ៉ែក្នុងលក្ខណៈជាប្រភេទផលិតផលសំរេច តាមការតម្រូវក្នុងការនាំចេញនៃផលិតផលសំរេចនោះ។