បរិយាយ

ដើម្បីអនុវត្តសកម្មភាពប្រតិបត្តិការធនធានរ៉ែ ទាំងការសិក្សាបឋម (បុរេសនា) ការស្វែងរុករក និងការធ្វើអាជីវកម្មដូចជាជីកយករ៉ែ ធ្វើប្រព្រឹត្តិកម្ម ដឹកជញ្ជូន នាំចេញក្នុងគោលបំណងពាណិជ្ជកម្មជាដើម គឺតម្រូវឲ្យមាន អាជ្ញាប័ណ្ណធនធានរ៉ែ។

អតិថិជនដែលមានបំណងដាក់ពាក្យស្នើសុំអាជ្ញាប័ណ្ណធនធានរ៉ែ ត្រូវធ្វើការចុះបញ្ជី និងទទួលការឯកភាពយល់ព្រមលើឯកសារលទ្ធផលនៃការសិក្សាសមិទ្ធិលទ្ធភាពរបស់ខ្លួន ពីក្រសួងរ៉ែ និងថាមពលជាមុន។

ការដែលមានអាជ្ញាប័ណ្ណធនធានរ៉ែ ជាការតម្រូវចាំបាច់មុននឹងអតិថិជនអាចស្នើសុំទៅក្រសួងស្ថាប័នពាក់ព័ន្ធនូវលិខិតអនុញ្ញាតសម្រាប់ការនាំចេញធនធានរ៉ែក្នុងលក្ខណៈជាប្រភេទផលិតផលសំរេច ដូចជាខ្សាច់ស៊ីលីស និងថ្មបន្ទះ។

សម្រាប់ការនាំចេញធនធានរ៉ែធម្មជាតិគ្រប់ប្រភេទគឺមិនអនុញ្ញាតទេ (អនុក្រឹតលេខ ០៨ ស្តីពីការកំណត់គោលការណ៏វិនិយោគលើធនធានរ៉ែគ្រប់ប្រភេទ)។

អាជ្ញាប័ណ្ណធនធានរ៉ែ ដែលជាការតម្រូវចាំបាច់សម្រាប់ការនាំចេញនាំចូលមានពីរប្រភេទ៖ អាជ្ញាប័ណ្ណស្វែងរុករករ៉ែ និងអាជ្ញាប័ណ្ណឧស្សាហកម្មអាជីវកម្មធនធានរ៉ែ។  អតិថិជនត្រូវមានអាជ្ញាប័ណ្ណស្វែងរុករករ៉ែជាមុន ទើបអាចស្នើសុំអាជ្ញាប័ណ្ណឧស្សាហកម្មអាជីវកម្មធនធានរ៉ែបាន។

ឯកសារនេះបញ្ជាក់ពីការអនុវត្តនិតិវិធីរបស់អតិថិជនក្នុងការស្នើសុំ វិញ្ញាបនប័ត្រចុះបញ្ជី  ដែលជាការតម្រូវមួយមុននឹងធ្វើការស្នើសុំអាជ្ញាប័ណ្ណធនធានរ៉ែ ។

កន្លែងដាក់ពាក្យស្នើសុំ

រាល់ការទទួលគំរូពាក្យស្នើសុំ ការដាក់ពាក្យ ការបង់កម្រៃសេវា និងការទទួលលិខិតគឺធ្វើនៅលេខាធិការដ្ឋាននៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល។

អតិថិជនដាក់ពាក្យស្នើសុំចុះបញ្ជីនេះនៅលេខាធិការដ្ឋាននៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល តំណាលគ្នានឹងការដាក់ពាក្យស្នើសុំចុះបញ្ជីពាណិជ្ជកម្ម នៅក្រសួងពាណិជ្ជកម្មដែរ។ អគ្គនាយកដ្ឋានរ៉ែមានទីតាំងនៅក្នុងទីស្តីការក្រសួងដែលមានអាស័យដ្ឋាន:

ក្រសួងរ៉ែ និងថាមពល៖ លេខ៧៩-៨៩, វិថី ប៉ាស្ទ័រ (៥១), សង្កាត់ផ្សារថ្មី៣ ខ័ណ្ឌដូនពេញ រាជធានីភ្នំពេញ កម្ពុជា

Tel: ០២៣​ ២១៩ ៥៧៤

E-mail: info@mme.gov.kh

វែបសាយ:      http://www.mme.gov.kh/

សំគាល់ 1

អតិថិជនមកទទួលពាក្យស្នើសុំចុះបញ្ជី Application Form ពីលេខាធិការដ្ឋាន របស់អគ្គនាយកដ្ឋានរ៉ែ។

សំគាល់ 2

អតិថិជនដែលជាប្រធានក្រុមប្រឹក្សាភិបាល ឬអភិបាលក្រុមហ៊ុនមកដាក់ពាក្យស្នើសុំ ។

​

ឯកសារភ្ជាប់ រួមមាន៖

• ប្រវត្តិរូបមានបិទរូបថត និងមានការបញ្ជាក់ពីអាជ្ញាធរមូលដ្ឋាន
• ឯកសារបញ្ជាក់អត្តសញ្ញាណរបស់ប្រធានក្រុមប្រឹក្សាភិបាល អភិបាលក្រុមហ៊ុន ដូចជាអត្តសញ្ញាណប័ណ្ណ ឬលិខិតឆ្លងដែន (ច្បាប់ចម្លង ដោយមានការបញ្ជាក់ចម្លងត្រឹមត្រូវតាមច្បាប់ដើម)
• ឯកសារបញ្ជាក់ពីទីតាំងក្រុមហ៊ុន ចេញដោយស្រុក/ខ័ណ្ឌ
• លក្ខនិ្តកៈក្រុមហ៊ុន (ច្បាប់ចម្លង)
• ច្បាប់ចម្លងលិខិតបញ្ជាក់ការចុះបញ្ជីពាណិជ្ចកម្ម ដោយមានការបញ្ជាក់ចម្លងត្រឹមត្រូវតាមច្បាប់ដើមពីក្រសួងសាម៉ី

សំគាល់ 3

ការអនុវត្តនិតិវីធីផ្ទៃក្នុងត្រូវបានចាប់ផ្តើមពីការិយាល័យជំនាញ និងឆ្លងកាត់តាមឋានានុក្រមមួយចំនួនដែលមានកំនត់ក្នុងច្បាប់។ មុននឹងឈានដល់សេចក្តីសំរេចណាមួយ មន្ត្រីជំនាញអាចនឹងទំនាក់ទំនងទៅអតិថិជនដោយផ្ទាល់ សំរាប់ការបំពេញបន្ថែមចាំបាច់ណាមួយដែលត្រូវការសំរាប់ភាពគ្រប់គ្រាន់នៃការស្នើសុំ ដូចជាតម្រូវឲ្យអតិថិជនយកឯកសារបន្ថែមមកផ្តល់ជូនមន្រ្តីជំនាញជាដើម។

បន្ទាប់ពីសេចក្តីសម្រេចអនុញ្ញាតលើពាក្យស្នើសុំ លេខាធិការដ្ឋានទាក់ទងទៅអតិថិជនជំរាបពីលទ្ធផលនៃសេចក្តីសម្រេច និងឲ្យមកបង់កម្រៃសេវា។

សំគាល់ 4

តម្លៃសេវាកម្ម ដែលបានកំណត់ក្នុងប្រកាសរួមរបស់ក្រសួងសេដ្ឋកិច្ច​​ និងក្រសួងរ៉ែ និងថាមពល ស្តីពីការផ្តល់សេវាសាធារណៈរបស់ក្រសួងរ៉ែ និងថាមពល គឺXXXលានរៀល។

សំគាល់ 5

ពេលមកទទួលយកវិញ្ញាបនប័ត្រចុះបញ្ជីអតិថិជនគួរភ្ជាប់មកជាមួយអត្តសញ្ញាណប័ណ្ណ ឬលិខិតសំគាល់ខ្លួនផ្សេងៗ រួមជាមួយនឹងបង្កាន់ដៃទទួលពាក្យ។

អតិថិជនបន្តនិតិវិធីក្នុងការស្នើសុំធ្វើការសិក្សាបឋម (បុរេសនា) និងទទួលការឯកភាពយល់ព្រមលើឯកសារលទ្ធផលនៃការសិក្សាសមិទ្ធិលទ្ធភាពជាមុនសិន មុននឹងអាចបន្តនិតិវិធីក្នុងការស្នើសុំអាជ្ញាប័ណ្ណស្វែងរុករករ៉ែបាន។