បរិយាយ

ការស្នើសុំសម្រាប់ការប្រើសញ្ញាចុះបញ្ជីផលិតផល ដែលត្រូវអនុលោមតាមបទប្បញ្ញត្តិបច្ចេកទេស ឬស្តង់ដារបញ្ជានេះជាការតម្រូវមុននឹងផលិតផលផលឧស្សាហកម្មទាំងអស់ រួមទាំងផលិតផលឧស្សាហកម្មនាំចូលផងដូចជាផលិតផលម្ហូបអាហារ និងផលិតផល អគ្គីសនី និងអេឡិចត្រូនិច អាចធ្វើការផ្សព្វផ្សាយពាណិជ្ចកម្ម និងធ្វើចរាចរនៅលើទីផ្សារក្នុងប្រទេសកម្ពុជា។

អាជ្ញាប័ណ្ណនេះចំាបាច់សំរាប់ការស្នើសុំលិខិតបញ្ជាក់ទំនិញនាំចូលចំពោះផលិតផលផលិតផលឧស្សាហកម្ម តាមការតម្រូវរបស់សមត្ថកិច្ចពាក់ព័ន្ធ និងតាមការស្នើសុំ។

កន្លែងដាក់ពាក្យស្នើសុំ

រាល់ការទទួលគំរូពាក្យស្នើសុំ ការដាក់ពាក្យ​ ការបង់កម្រៃសេវា និងការទទួលលិខិតគឺធ្វើនៅបញ្ជរច្រកចេញចូលតែមួយរបស់វិទ្យាស្ថានជាតិស្តង់ដាកម្ពុជា  ដែលមានទីតាំងក្នុងអាគារនៃវិទ្យាស្ថានជាតិស្តង់ដាកម្ពុជាដែលមានអាស័យដ្ឋាន៖

អាគារលេខ ៥៣៨ ផ្លូវជាតិលេខ ២ សង្កាត់ចាក់អង្រែលើ ខ័ណ្ឌមានជ័យ ក្រុងភ្នំពេញ ព្រះរាជាណាចក្រកម្ពុជា

ទូរស័ព្ទទំនាក់ទំនង: ០១២ ៨៦៣៧៩២

វែបសាយ:    http://www.isc.gov.kh/

សំគាល់ 1

អតិថិជនអាចទំនាក់ទំនងទៅបញ្ជរច្រកចេញចូលតែមួយរបស់វិទ្យាស្ថានជាតិស្តង់ដាកម្ពុជា ​ ដើម្បីសុំគម្រូពាក្យស្នើសុំ។​

សំគាល់ 2

អតិថិជនអាចចាត់តំណាងមកដាក់ពាក្យស្នើសុំ តែត្រូវឲ្យមានលិខិតប្រគល់សិទ្ធ ឬលិខិតឧទ្ទេសនាម ។ អតិថិជនត្រូវបង់កម្រៃសេវា ១.៥លានរៀល និង១លានរៀលសម្រាប់ផលិតផលគ្រឿងអេឡិចត្រូនិច។ បង្កាន់ដៃបង់ប្រាក់មួយច្បាប់នឹងត្រូវប្រគល់មកអតិថិជន​ និងមួយច្បាប់ទៀតត្រូវភ្ជាប់ជាមួយនឹងសំណុំឯកសារពាក្យស្នើសុំ។

​

ឯកសារអមភ្ជាប់សម្រាប់ការស្នើសុំអាជ្ញាប័ណ្ណប្រើសញ្ញាចុះបញ្ជីផលិតផលមាន៖

• ប្រកាសអនុញ្ញាតបើកក្រុមហ៊ុនរោងចក្រ សហកគ្រាស និងសិប្បកម្ម
• បើក្រុមហ៊ុនត្រូវមាន វិញ្ញាបនបត្រចុះបញ្ជីពាណិជ្ចកម្ម វិញ្ញាបនបត្រចុះបញ្ជីអាករលើតម្លៃបន្ថែម ប័ណ្ណប៉ាតង់ (មានសុពលភាព ចម្លង) និងឯកសារផ្សេងៗទៀត
• គំរូស្លាកព្រាងសំរាប់បិទលើសំបកវេចខ្ចប់ផលិតផល (១០សន្លឹក)
• វិញ្ញាបនប័ត្រចុះបញ្ជីសញ្ញាសំគាល់ ឬពាណិជ្ជសញ្ញានៃផលិតផល (ច្បាប់ចម្លង ១ច្បាប់)
• តារាងរាយឈ្មោះ និងបទដ្ឋានវត្ថុធាតុដើម ដែលប្រើក្នុងការផលិត (១ច្បាប់)
• គំនូសបំព្រួញខ្សែសង្វាក់ផលិតកម្ម និងប្លង់ទីតាំងផលិតកម្ម
• គំរូផលិតផលជាក់លាក់សំរាប់ការវិភាគនៅមន្ទីរពិសោធន៏ និងសំរាប់តំកល់ទុកមួយចំនួន  (អាចផ្តល់ Test Report and Factory Inspection Report ឬ Certification of Confirmation and Factory Inspection Report តែម្តងបើមានចេញដោយមន្ទីរពិសោធន៏ណាមួយដែលទទួលស្គាល់ដោយក្រសួង ហើយមានសុពលភាពមុនបីខែ)
• លិខិតធានាអះអាងលើស្តង់ដារផលិតផល (១ច្បាប់)

សំគាល់ 3

ការអនុវត្តនិតិវីធីផ្ទៃក្នុងត្រូវបានចាប់ផ្តើមពីការិយាល័យជំនាញ និងឆ្លងកាត់តាមឋានានុក្រមមួយចំនួនដែលមានកំនត់ក្នុងច្បាប់។ មុននឹងឈានដល់សេចក្តីសំរេចណាមួយ មន្ត្រីជំនាញអាចនឹងទំនាក់ទំនងទៅអតិថិជនដោយផ្ទាល់ សំរាប់ការបំពេញបន្ថែម​ចាំបាច់ណាមួយដែលត្រូវការសំរាប់ភាពគ្រប់គ្រាន់នៃការស្នើសុំដូចជាតម្រូវឲ្យអតិថិជនយកឯកសារបន្ថែមមកផ្តល់ជូនមន្រ្តីជំនាញជាដើម។

សំគាល់ 4

អាជ្ញាប័ណ្ណនេះមានសុពលភាព៣ឆ្នាំ។ មានករណីមួយចំនួនដែលអតិថិជនត្រូវបានប្រាប់ឲ្យមកទទួលយកអាជ្ញាប័ណ្ណពី នាយកដ្ឋានជំនាញផ្ទាល់តែម្តង។ ពេលមកទទួលយកអាជ្ញាប័ណ្ណ អតិថិជនគួរភ្ជាប់មកជាមួយអត្តសញ្ញាណប័ណ្ណ ឬលិខិតសំគាល់ខ្លួនផ្សេងៗ រួមជាមួយនឹងបង្កាន់ដៃទទួលពាក្យ/បង្កាន់ដៃបង់ប្រាក់។

អាជ្ញាប័ណ្ណនេះចាំបាច់សំរាប់ការស្នើសុំលិខិតបញ្ជាក់ទំនិញនាំចូលចំពោះផលិតផលផលិតផលឧស្សាហកម្ម តាមការតម្រូវរបស់សមត្ថកិច្ចពាក់ព័ន្ធ និងតាមការស្នើសុំ។