លិខិតអនុញ្ញាតខាងលើជាការតម្រូវសំរាប់ការនាំចេញ សំណល់/កម្ទេចអេតចាយដែលអាចយកទៅធ្វើការកែច្នៃបាន ដូចជាសំបកកំប៉ុង ក្រដាសកាតុង ជំនៀដែក ឬ ជំនៀអាលុយមីញ៉ូម ផ្លាស្ទីក គ្រោងដែកអេតចាយជាដើម។

សំរាប់កម្ពុជា រាល់កាកសំនល់រឹងទាំងអស់ ទោះអាចកែច្នៃបាន ឬមិនអាចកែច្នៃបានក៏ដោយ គឺត្រូវបានហាមឃាត់មិនឲ្យនាំចូលដាច់ខាតតែម្តង (អនុក្រឹតលេខ៣៦ ស្តីពីការគ្រប់គ្រងសំណល់រឹង) ។ ប៉ុន្តែពេលថ្មីៗនេះ មានសេចក្តីជូនដំណឹង (សជណ លេខ ១៥៣៩) ចេញដោយទីស្តីការគណៈរដ្ឋមន្ត្រី បានសំរេចយល់ព្រមជាគោលការណ៍ អនុញ្ញាតឲ្យមានការនាំចូលកំទេចកំទី ជំនៀដែក ឬអង្កាច់លោហៈធាតុដែលស្ថិតនៅក្នុងលេខកូដ HS code៖ 7204.10, 7204.21, 7204.30, 7204.41 តែត្រូវតំរូវឲ្យមានការត្រួតពិនិត្យ និងអនុញ្ញាតជាមុនពីស្ថាប័នមានសមត្ថកិច្ច។ ប៉ុន្តែការអនុវត្តនិតិវិធីបែបណាមួយនោះ គឺនៅមិនទាន់បានកំណត់នៅឡើយទេ ។

រាល់ការទទួលគំរូពាក្យស្នើសុំ ការដាក់ពាក្យ ការបង់កម្រៃសេវា និងការទទួលលិខិតគឺធ្វើនៅបញ្ជរច្រកចេញចូលតែមួយរបស់ក្រសួងកសិកម្ម ដែលមានទីតាំងក្នុងទីស្តីការក្រសួង។

បញ្ជរច្រកចេញចូលតែមួយនេះ មានមន្រ្តីមកពីនាយកដ្ឋានត្រូតពិនិត្យ ការបំពុលបរិស្ថាន នៃអគ្គនាយកដ្ឋានបច្ចេកទេសដែលជានាយកដ្ឋានជំនាញក្នុងការផ្តល់សេវាកម្មទៅលើការចេញប្រភេទលិខិតអនុញ្ញាតខាងលើ នៅប្រចាំការដើម្បីបំរើផ្តល់សេវាកម្មទាក់ទងនឹងអង្គភាពរបស់ខ្លួន។

ក្រសួងបរិស្ថាន

• អាសយដ្ឋាន៖ អគារមរតកតេជោ ដីឡូលេខ៥០៣ ផ្លូវកៅស៊ូអមមាត់ទន្លេបាសាក់
  សង្កាត់ទន្លេបាសាក់ ខណ្ឌចំការមន រាជធានីភ្នំពេញ
• លេខទំនាក់ទំនង៖ (+៨៥៥) ២៣ ២១៣ ៩០៨/(+៨៥៥) ២៣ ២២០ ៣៦៩
• គេហទំព័រ៖ ទំព័រដើម | ក្រសួងបរិស្ថាន (moe.gov.kh)

កំណត់ចំណាំទី១

អ្នកស្នើសុំអាចទទួលគំរូពាក្យស្នើសុំពីបញ្ជរច្រកចេញចូលតែមួយរបស់ក្រសួងបរិស្ថាន។

កំណត់ចំណាំទី២

ឯកសារភ្ជាប់រួមមាន៖

• វិក្កយបត្រ
• បញ្ជី​វេច​ខ្ចប់
• វិញ្ញាបនបត្រចុះបញ្ជីពាណិជ្ចកម្ម
• វិញ្ញាបនបត្រចុះបញ្ជីអាករលើតម្លៃបន្ថែម

វិញ្ញាបនបត្រចុះបញ្ជីពាណិជ្ចកម្ម និងវិញ្ញាបនបត្រចុះបញ្ជីអាករលើតម្លៃបន្ថែមអាចជាច្បាប់ថតចម្លង ដែលមបញ្ជាក់ពីក្រសួង ស្ថាប័នសាម៉ី។

កំណត់ចំណាំទី៣

ការអនុវត្តនិតិវីធីផ្ទៃក្នុងត្រូវបានចាប់ផ្តើមពីការិយាល័យជំនាញ និងឆ្លងកាត់តាមឋានានុក្រមមួយចំនួនដែលមានកំនត់ក្នុងច្បាប់។ មុននឹងឈានដល់សេចក្តីសំរេចណាមួយ មន្ត្រីជំនាញអាចនឹងទំនាក់ទំនងទៅអ្នកស្នើសុំដោយផ្ទាល់ សំរាប់ការបំពេញបន្ថែម​ចាំបាច់ណាមួយដែលត្រូវការសំរាប់ភាពគ្រប់គ្រាន់នៃការស្នើសុំដូចជាតម្រូវឱ្យអ្នកស្នើសុំយកឯកសារបន្ថែមមកផ្តល់ជូនមន្រ្តីជំនាញជាដើម។

កំណត់ចំណាំទី៤

បន្ទាប់ពីការចេញសេចក្តីសម្រេចអនុញ្ញាតលើពាក្យស្នើសុំ មន្ត្រីជំនាញនឹងទាក់ទងទៅអ្នកស្នើសុំឱ្យមកបង់កម្រៃសេវាកម្ម។ តម្លៃសេវាកម្ម គឺកំណត់ដោយយថាប្រភេទ បរិមាណនៃទំនិញ/ផលិតផលដែលស្នើសុំនាំចេញ និងអនុលោមទៅតាមប្រកាសរួមរបស់ក្រសួងសេដ្ឋកិច្ច​​ និងក្រសួងបរិស្ថាន ស្តីពីការផ្តល់សេវាសាធារណៈរបស់ក្រសួងបរិស្ថាន។

កំណត់ចំណាំទី៥

លិខិតអនុញ្ញាតនេះមានបញ្ជាក់ពីយថាប្រភេទ បរិមាណ នៃទំនិញ និងសុពលភាព (១ខែ)។ ពេលមកទទួលយកលិខិតអនុញ្ញាត អ្នកស្នើសុំគួរភ្ជាប់មកជាមួយអត្តសញ្ញាណប័ណ្ណ ឬលិខិតសំគាល់ខ្លួនផ្សេងៗ រួមជាមួយនឹងបង្កាន់ដៃទទួលពាក្យ/បង្កាន់ដៃបង់ប្រាក់។